Տաշիրում անտառագողերը բերման են ենթարկվել ոստիկանություն

Սեպտեմբերի 12-ի լույս 13-ի գիշերը անհայտ խմբի կողմից Տաշիրի անտառտնտեսության Տաշիրի անտառպետության 8-րդ քառակուսու 2-րդ անտառամասում կատարվել է ապօրինի ծառահատում, որը սեպտեմբերի 13-ի առավոտյան՝ ժամը 9.00-ի սահմաններում, հայտնաբերվել է Տաշիրի անտառտնտեսության Տաշիրի անտառպետության թիվ 1 պահաբաժնի աշխատակցի կողմից:

Այս մասին հայտնում են ՀՀ ԳՆ «Հայանտառ» ՊՈԱԿ-ից։

«Ապօրինի ծառահատման դեպքն արձանագրելուց անմիջապես հետո Տաշիրի անտառտնտեսության ողջ տարածքում աշխատակիցները կատարել են շուրջօրյա հսկողություն, և սեպտեմբերի 13-ի լույս 14-ի գիշերը՝ ժամը 00.30-ի սահմաններում, Տաշիրի անտառտնտեսության աշխատակիցների օպերատիվ գործողությունների արդյունքում գողության հերթական փորձի ժամանակ հայտնաբերվել են անտառագողերը:

Այդ աշխատանքներին ներգրավվել են նաև իրավապահ մարմինների աշխատակիցները:

Համապատասխան միջոցառումների արդյունքում իրավապահ մարմինների կողմից Ford մակնիշի բեռնատար ավտոմեքենան անտառագողերի հետ միասին տեղափոխվել է Տաշիրի ոստիկանություն, ինչպես նաև կալանքի տակ են վերցվել Սվերդլով համայնքում գտնվող սղոցարանները:

Այժմ կատարվում են տարածքի տեղազննման աշխատանքներ ապօրինի հատված ծառերի վերջնական քանակը պարզելու համար»,-ասվում է հաղորդագրությունում։