Մանկավարժականում թեժ կրքեր ու լարվածություն է հասունանում...
ՎԵՐԼՈՒԾՈՒԹՅՈՒՆՆԵՐ
shame.am-ը գրում է․
Նոր ուստարում Մանկավարժականի ուսանողների թվի էական նվազումը առիթ հանդիսացավ, որ բուհի ղեկավարությունը ձեռնարկի օպտիմալացմանն ուղղված միջոցառումներ, այն է՝ կրճատել դասախոսական կազմը:
Սա էլ իր հերթին հավելյալ կրքեր ու լարվածություն բերեց համալսարանին:
Այս հարկադիր քայլերն ինչ-որ տեղ նույնիսկ կարելի էր արդարացնել, եթե անհերքելի լիներ, որ Մանկավարժական համալսարանի հնարավորությունները սուղ են և այլ ելք չկա, քան կադրային ջարդը:
Բայց արի ու տես, որ Ռուբեն Միրզախանյանի ղեկավարած կառույցի դրամապանակն իրականում ռեկտորի պես պարարտ ու լիքն է:
Այդ մասին լավագույն վկայությունը կարելի է գտնել Մանկավարժական համալսարանի կայքում տեղադրված 2016թ. գնումների ծրագրում:
Իսկ այստեղ շատ հետաքրքիր թվերի կարելի է հանդիպել, որոնցից ամենահատկանշականը հետևյալն է. բուհը նախատեսել է իրենց կարիքների համար ձեռք բերել 20 մլն դրամ արժողությամբ մեքենա:
Հասկանալի է, որ նման թանկարժեք ավտոմեքենան չի ծառայելու ուսանողներին կամ դասախոսներին: Նման շքեղությունը միայն վայել կլինի ռեկտոր Միրզախանյանին՝ իբրև ծառայողական փոխադրամիջոց: Եվ երբ նա սկսի դրանով երթևեկել, հազիվ թե առիթ ունենա հիշելու այն մանկավարժներին, որոնք իր թեթև ձեռքով գործազուրկ դարձան:
