Արթուր Աբրահամը հերքում է հայկական մաֆիայի հետ կապ ունենալու մասին լուրերը

Պրոֆեսիոնալ բռնցքամարտիկ Արթուր Աբրահամը հերքում է Գերմանիայում հայկական մաֆիայի հետ իր կապի մասին լուրերը: Վերջերս գերմանական մամուլում կրկին ակտիվացել են խոսակցություններն այն մասին, թե նա առնչություն ունի մաֆիայի հետ: Նշվում է, որ Գերմանիայի դաշնային ոստիկանությունը շուրջ 3 տարի փորձում է ձերբակալել հայկական մաֆիայի անդամներին ու ըստ ԶԼՄ-ների՝ հետաքննության շրջանակներում շրջանառվել է նաեւ Արթուր Աբրահամի անունը: «Հայկական ժամանակ»-ը ճշտեց մարզիկի կարծիքն այս մասին:

«Անհեթեթ լուրեր են, դրանք ընդհանրապես ո՛չ ինձ հետ կապ ունեն, ո՛չ էլ հայերի»,- ասաց նա:

Գերմանական մամուլը եւս մեկ հայազգի բռնցքամարտիկի անուն է նշում: Ըստ նրանց՝ ոստիկանության ուշադրության կենտրոնում է նաեւ Կարո Մուրատը:

2017 թ. գերմանական մամուլում լուրեր էին տարածվել, թե Արթուր Աբրահամը ծանոթ է մաֆիայի անդամների հետ: Գերմանական պարբերականների համաձայն՝ 2017-ի ապրիլին նրան Էրֆուրտում ռեստորաններից մեկում տեսել են Գեւորգ եւ Արամ եղբայրների հետ խոսելիս: Վերջիններս հարցաքննվել են մոտ 4 տարի առաջ Էրֆուրտում հայկական 2 խմբավորումների միջեւ տեղի ունեցած փոխհրաձգության գործով: