Սեզոնային գրիպի կանխարգելման նպատակով հաջորդ շաբաթվանից Հայաստանում պատվաստումներ կիրականացվեն
ՀԱՍԱՐԱԿՈՒԹՅՈՒՆԳրիպի և սուր շնչառական վարակների կանխարգելման նպատակով հաջորդ շաբաթվանից Հայաստանում պատվաստումներ կիրականացվեն: «Արմենպրես»-ի հաղորդմամբ` այս մասին հոկտեմբերի 25-ին Գրիպի տարեկան աշխատաժողովի ընթացքում լրագրողների հետ զրույցում ասաց ՀՀ առողջապահության նախարարության ՀՎԿ ազգային կենտրոնի գլխավոր տնօրենի խորհրդական Գայանե Սահակյանը:
«Սկզբնական շրջանում փակ կազմակերպություններում, խոցելի խմբերում պատվաստումներ կիրականացվեն, հետո` ըստ համապատասխան ռիսկի խմբերի»,-նշեց Սահակյանը:
Նրա խոսքով` ՀՀ առողջապահության նախարարությունը սահմանել է ռիսկի խմբերը: «Ամբողջ աշխարհում ամենառիսկային խումբն են համարվում հղիները, ռիսկային խումբ են բուժաշխատողները, վեց ամսականից մինչև հինգ տարեկան երեխաները»,-ընդգծեց նա:
Գայանե Սահակյանն ասաց, որ Առողջապահության համաշխարհային կազմակերպության կողմից յուրաքանչյուր սեզոնի համար որոշում է, թե տվյալ սեզոնին, որ հարուցիչներն են շրջանառվելու, և դրանք ներառվում են պատվաստանյութի բաղադրության մեջ:
Անդրադառնալով պատվաստումների վիճակագրությանը`Սահակյանը նշեց, որ եթե նախկինում միայն բուժաշխատողների շրջանում էր հաջողվում շատ բարձր ընդգրկում ապահովել, ապա հիմա պատվաստումների քանակը բարձրացել է նաև հղիների, զինծառայողների շրջանում:
