Փարիզում Շառլ Ազնավուրի հիշատակին նվիրված մեծ համերգ կկազմակերպվի
ՀԱՍԱՐԱԿՈՒԹՅՈՒՆԱյս տարվա հոկտեմբերին Փարիզում Շառլ Ազնավուրի հիշատակին նվիրված մեծ համերգ կկազմակերպվի: Շվեյցարիայի հեռուստառադիոընկերությանը (RTS) տված հարցազրույցում այս մասին ասել է Հայատանի նախագահ Արմեն Սարգսյանը:
Նախագահը հայտնել է, որ Ֆրանսիայի նախագահ Էմանուել Մակրոնի հետ պայմանավորվել է Շառլ Ազնավուրի հիշատակին նվիրված մեծ բարեգործական համերգ կազմակերպել:
Համերգը, հավանաբար, տեղի կունենա 2019 թվականի հոկտեմբերին: Համերգին մասնակցելու համար բազմաթիվ կատարողներ են հրավիրվելու:
Խոսելով վերջերս Մակրոնի Երեւան կատարած այցի մասին՝ Արմեն Սարգսյանը նշել է, որ նրանք իրենց տիկնանց հետ այցելել են Ազնավուրի թանգարան:
«Ես նախագահ Էմանուել Մակրոնին առաջարկեցի մեկ տարվա ընթացքում Փարիզում Շառլ Ազնավուրի հիշատակին նվիրված մեծ բարեգործական համերգ կազմակերպել: Հուսով եմ, որ համերգը կկայանա 2019-ի հոկտեմբերին: Դա պետք է բարեգործական համերգ լինի, որին մասնակցելու համար կհրավիրվեն համաշխարհային ճանաչում ունեցող երգիչներ եւ արտիստներ: Ես խոսել եմ իմ ընկերների հետ եւ նրանք հայտարարել են, որ իրենց համար պատիվ կլինի իրենց արվեստն այդ համերգին ներկայացնելու համար», - ասել է Արմեն Սարգսյանը:
