Ուկրաինայում ՀՀ դեսպանը հայտարարել է դիվանագիտական աշխատանքը դադարեցնելու որոշման մասին

Ուկրաինայում ՀՀ արտակարգ և լիազոր դեսպան Անդրանիկ Մանուկյանը որոշել է դադարեցնել իր դիվանագիտական աշխատանքը: Ինչպես տեղեկացնում է «Արմենպրես»-ը, այս մասին դեսպանը գրառում է կատարել ֆեյսբուքի իր էջում:

«Ընկերներ, մինչև արձակուրդի ավարտը կա դեռ մի քանի օր: Ժամանակը, որ ես անցկացրեցի հարաբերական հանգստության մեջ, ամրապնդեց իմ մեջ կարևոր մի որոշում: Ես որոշել եմ թողնել իմ դիվանագիտական աշխատանքը: Այս որոշումն իմ մեջ հասունացել է վաղուց: Բացահայտեմ փոքրիկ գաղտնիք՝ վերջին տարիներին ես մի քանի անգամ դիմել եմ Երևանին՝ խնդրելով հետ կանչել ինձ: Վերջին անգամ դիմեցի այս տարվա մայիսին, սակայն ամեն անգամ մերժում էի ստանում, ինձ խնդրում էին շարունակել Ուկրաինայում ՀՀ դեսպանի իմ գործունեությունը: Ու հարցն այն չէ, որ ես Ուկրաինայում ՀՀ դեսպանի պաշտոնում աշխատել եմ երկու ամբողջական ժամկետ ու գերազանցել եմ այս պատասխանատու պաշտոնում բոլոր հնարավոր դեդլայնները: Բանը նրանում է, որ այժմ Հայաստանում որակապես այլ իրավիճակ է, և ես անկեղծորեն կարծում եմ, որ եկել է ժամանակը թույլ տալու երիտասարդներին աճել ու կայանալ: Հույս ունեմ՝ այս անգամ կստանամ դրական պատասխան»,- գրել է դեսպանը: