Իսպանիայում ձերբակալվել է հայ «օրենքով գող»

Իսպանիայի Ազգային ոստիկանությունը Մարբելյեում (Մալագա նահանգ, Անդալուզիայի ինքնավար միություն) ձերբակալել է Հայաստանի եւ Վրաստանի 3 քաղաքացիների, որոնք կասկածվում են կազմակերպված հանցավորության հետ կապերի մեջ:

Ձերբակալված են Լիտվայում բնակվող Հայաստանի քաղաքացի Ա. Ս.-ն, ինչպես նաեւ Վրաստանի 2 քաղաքացիներ L.B.-ն եւ I.P.-ն, «ՌԻԱ Նովոստի»-ին հայտնել են ոստիկանությունից:

Նրանց ձերբակալությունը, այսպես կոչված, «հայկական մաֆիայի» վնասազերծման աղմկոտ գործողության շարունակությունն է, որի ընթացքում հունիսի վերջին կալանավորվել էր 129 մարդ:

Մարբելյեի ռեստորաններից մեկում երեք տղամարդիկ ձերբակալվել են հանդիպման ժամանակ, որի ընթացքում, ենթադրաբար, ծրագրում էին մրցակից խմբավորման անդամի սպանությունը (որը պատրաստվում էր բնակություն հաստատել Իսպանիայում), վերակազմավորել հունիսին ջախջախված կազմակերպված հանցավոր խմբավորումը եւ «կազմակերպության ուժը ցուցադրել Եվրոպայում»:

Երեքն էլ կալանավորված են մահափորձի, փաստաթղթերի կեղծման եւ հանցավոր խմբավորմանը պատկանելու մեղադրանքներով: Խուզարկությունների ժամանակ հայտնաբերվել են նրանց անուններով լեհական եւ ուկրաինական կեղծ փաստաթղթեր:

Քննությունը սկսվել է հուլիսին, երբ Իսպանիայի իրավապահ մարմինները պարզել են, որ «Մարբելյեում են գտնվում մի քանի մարդիկ, որոնք կապված են «օրենքով գողերից» Եվրոպայում ամենակարեւորներից մեկի հետ», որը «Լիտվայից ղեկավարել է կազմակերպությունը, որը վնասազերծվել էր հունիսին, երբ Kus գործողության ընթացքում 129 մարդ էր կալանավորվել, այդ թվում՝ 7 «օրենքով գող»», նշված է ոստիկանության հաղորդագրության մեջ:

Ոստիկանության տեղեկություններով՝ Վալենսիայում կազմակերպված հանցավոր խմբավորման անդամներից մեկի դեմ մահափորձից հետո, որը կանխել էր Ազգային ոստիկանությունը (կատարողը ձերբակալվել էր) Ա. Ս.-ն Իսպանիայում հիմնավորված խմբավորման առաջնորդներին հրամայել է Լիտվա ժամանել՝ լուծելու «կլանների միջեւ խնդիրները»:

Հունիսի 26-ին Ազգային ոստիկանությունը հայտնել էր լայնամասշտաբ գործողության անցկացման մասին, այսպես կոչված, «հայկական մաֆիայի» դեմ՝ ծագումով Հայաստանից մարդկանց հանցավոր խոշորագույն խմբավորում Եվրոպայում: