Վանաձորում գազատարի արտահոսքից ծագած հրդեհի հետևանքով հիվանդանոց է տեղափոխվել 6 մարդ

ՀՀ արտակարգ իրավիճակների նախարարությունը մարտի 29-ին, ժամը 16.20-ին տեղեկություն է ստացել, որ Լոռու մարզի Վանաձոր քաղաքի թիվ 24 դպրոցի մոտակայքում այրվում է գազատար խողովակ, տուժածներ չկան. գազի աշխատակիցները տեղում են:
Դեպքի վայր է մեկնել մեկ մարտական հաշվարկ:
Ինչպես տեղեկացրին ՀՀ արտակարգ իրավիճակների նախարարության հասարակայնության հետ կապերի բաժնից, պարզվել է, որ Ներսիսյան և Սանկտ Պետերբուրգի փողոցների խաչմերուկում՝ թիվ 24 դպրոցի մոտակայքում, «Գազպրոմ Արմենիա» ՓԲԸ-ի Լոռու ԳԳ մասնաճյուղի գազատար խողովակից տեղի է ունեցել գազի արտահոսք՝ հրդեհի բռնկումով, ինչի հետևանքով գազի վթարային ծառայության աշխատակիցներ՝ 1980 թ. ծնված Ա. Ղ.-ն, 1950 թ. ծնված Գ. Ս.-ն, 1985 թ. ծնված Ա. Մ.-ն, 1979 թ. ծնված Գ. Գ.-ն , 1959 թ. ծնված Ա. Ե.-ն և 1982 թ. ծնված Վ. Ղ.-ն ստացել են տարբեր աստիճանի այրվածքներ:
Մինչ հրշեջ-փրկարարների կանչի վայր հասնելը՝ տուժածները տեղի ուժերով տեղափոխվել են Վանաձորի ԲԿ:
Հրդեհը մեկուսացվել է ժամը 16.26-ին, մարվել՝ 16.32-ին: Հրշեջ-փրկարարներն իրականացրել են հերթապահություն՝ մինչ գազատար խողովակի ամբողջական դատարկվելը: