Նոր Հայաստանում արդարադատությունը դեռ պետք է կայացման ճանապարհ անցնի
ՀԱՍԱՐԱԿՈՒԹՅՈՒՆ
Էդվարդ Մանուկյանն իր ֆեյսբուքյան էջում գրում է.
Հենց այսօր, դատարանում կոտրվեցին բոլոր այն պատկերացումները, թե իբր նոր Հայաստանում չի շարունակվելու անօրինական գործելաոճը։ Էդուարդ Բաբայանին լրիվ անհիմն կերպով են պահում կալանքի տակ ու նաև ցանկանում ենք նշել, որ չկա ոչ մի մեղադրանք Էդուարդ Բաբայանի նկատմամբ և իրավապահ մարմինները որպես ցուցմունք ընդունել են Վյաչեսլավ Հարությունովի ասածները, ով տվյալ պահին գտնվել է պրոմեդոլ դեղի ազդեցության տակ։ Դատարանը անգամ մերժեց 50 միլիոն դրամ գրավի դիմաց Է․ Բաբայանին ազատ արձակելու միջնորդությունը։
Հենց վերջին շրջանում ականատես եղանք բազմաթիվ դեպքերի , երբ դատարանը գրավի դիմաց բաց թողեց անձանց, ովքեր կատարել էին բավականին լուրջ հանցագործություններ։ Իսկ այս դեպքում ի՞նչ է կամ ո՞վ է խանգարում դատարանին բաց թողնել Է․Բաբայանին, երբ անգամ Վյաչեսլավ Հարությունովն է բազմիցս հայտարարել, որ իր ստացած վնասվածքների հետ Էդուարդ Բաբայանը ոչ մի կապ չունի։
Մնում է եզրակացնել, որ այս ամենի հիմքում կան քաղաքական ենթաշերտեր, ինչը անընդունելի է նոր քաղաքական իրողությունում։ Օրենքը, փաստորեն, դեռ գործում է հատվածական և ընտրողաբար, իսկ անկախ դատական համակարգը և արդարադատությունը նոր Հայատսանում դեռ պետք է կայացման լուրջ ճանապարհ անցնի:
