Ովքեր կփոխարինեն Երեւանի ավագանուց հեռացած անդամներին. Դավիթ Խաժակյանը հայտնել է անունները
ՀԱՍԱՐԱԿՈՒԹՅՈՒՆԵրեւանի ավագանու ԵԼՔ խմբակցությունը կհամալրվի նոր անդամներով: Խմբակցության 13 անդամներից 4-ն, ինչպես հայտնի է, թավշյա հեղափոխության արդյունքում տեղի ունեցած վերադասավորումների արդյունքում անցել են այլ աշխատանքի:
Տիգրան Ավինյանը նշանակվել է Հայաստանի առաջին փոխվարչապետի պաշտոնում, Արայիկ Հարությունյանը՝ Կրթության եւ գիտության նախարարի, Ալեն Սիմոնյանը դարձել է Ազգային ժողովի պատգամավոր, Էդուարդ Աղաջանյանը վարչապետի աշխատակազմի ղեկավարն է:
Ավագանու ԵԼՔ խմբակցության ղեկավար Դավիթ Խաժակյանից տեղեկացանք, որ ընտրական ցուցակում հաջորդաբար հետեւյալ անձինք են՝ Վիկտոր Ենգիբարյան, Նելլի Ղարդյան, Նաիրա Հովհաննիսյան, Ռուբեն Ռուբինյան: Խաժակյանի ունեցած տեղեկությունների համաձայն, Ռուբեն Ռուբինյանը հրաժարվելու է ավագանու մանդատից, իսկ այդ դեպքում մանդատ կստանա նրան հաջոդող թեկնածուն՝ Հովհաննես Իգիթյանը:
ԵԼՔ խմբակցության նոր անդամները հրապարակված կենսագրություններ չունեն: «Հենց արձանագրությունը ԿԸՀ-ի կողմից կազմվի, արդեն իրենք կհամարվեն մանդատ ստացած եւ կենսագրությունները կհրապարակենք»,- ասաց Դավիթ Խաժակյանը:
