«Օրենքով գողերը» գալիս են Հայաստան՝ ի՞նչ անեն․ էստեղ արդեն ամեն ինչ գողացած-պրծած է. գալիս են միայն կերուխումի կամ սխոդկայի

Վրաստանի կառավարությունը խստացնում է օրենսդրությունը «օրենքով գողերի» նկատմամբ․ Վրաստանի ներքին գործերի նախարարությունը կառավարությանն է ներկայացրել օրենսդրական փոփոխությունների փաթեթ, որով առաջարկվում է խստացնել պայքարը «օրենքով գողերի» դեմ, մասնավորապես՝ Վրաստանում ներկայում գործող օրենսդրությամբ «օրենքով գողը» ազատազրկվում է 7-10 տարով, իսկ այս փոփոխություններով առաջարկվում է սահմանել 9-15 տարվա ազատազրկում։ Բացի այդ, գողական համայնքի մաս կազմելը կամ անդամակցությունն այդ համայնքին պատժվում է 5-8 տարվա ազատազրկմամբ, այս օրենսդրական փաթեթով նախատեսվում է 7-10 տարվա ազատազրկում։

Վրաստանի վարչապետ Գեորգի Կվիրիկաշվիլին այս կապակցությամբ հայտարարել է, որ օրենսդրական այսպիսի փոփոխությունը կանխարգելիչ նպատակ ունի, ինչպես նաև միտված է իրենց հասարակության անվտանգության մակարդակի բարձրացմանը՝ օրենսդրական մեխանիզմների միջոցով։

«Ուզում եմ նշել և վստահեցնել մեր բնակչությանը, որ Վրաստանում գողական մտածելակերպը երբեք չի ամրապնդվի, դա բացառվում է և այդ ուղղությամբ մենք լինելու ենք հետևողական և անողոք, քանի որ դա վերաբերում է մեր համաքաղաքացիների հանգստությանը, հանդարտ կյանքին և ապագայի կառուցմանը»,- հայտարարել է Կվիրիկաշվիլին։

Որքանո՞վ է հնարավոր Վրաստանի այս փորձը կիրառել Հայաստանում կամ այսպիսի օրենսդրական փաթեթ մշակել և «տեղայնացնել» Հայաստանի համար։

Հայաստանի ԱԱԾ տնօրենի նախկին տեղակալ Գուրգեն Եղիազարյանը համոզված է՝ եթե Հայաստանում օրենսդրական նման փաթեթ լինի, ապա այն կարող է հակառակ ազդեցությունն ունենալ, այսինքն՝ ըստ Եղիազարյանի բացառված չէ, որ իշխանությունների կամ իրավապահ համակարգի համար «անհաճո անձանց» կարող է «օրենքով գող» լինելու մեղադրանք առաջադրվել և ծանրագույն պատժաչափով ազատազրկել։

«Բոլորս գիտենք՝ Հայաստանում օրենքները, որպես կանոն, չեն կիրառվում կամ կիրառվում են ընտրողաբար․ այն մարդիկ, ովքեր պետք է լինեն բանտախցերում, նրանք դրսում են, իսկ նրանք, ովքեր ազատության մեջ պետք է լինեն և գործունեություն ծավալեն՝ բանտերում են և վաղն էլ են բանտերում մնալու և չկա որևէ երաշխիք, որ Հայաստանում նման օրենք ընդունելու դեպքում՝ տասնյակ, հարյուրավոր մարդիկ չեն տուժի․ մեր «օերքնով գողերի» մասին տեղեկություններ կան կամ կարող են լինել միայն հատուկ հաշվառման ցուցակներում, քարտադարաններում, որ այս կամ այն անձնավորությունը ինչ-որ մի թվականից թագադրված է որպես «օրենքով գող», բայց սա ընդամենը օպերատիվ աշխատողի ներկայացրած զեկուցագիրն է, որը հաստատվել է իր վերադասի կողմից․ եթե այսպես նայենք, ապա այդ օպերի ներկայացրածը և նրա վերադասի հաստատածը՝ առ ոչինչ է և երբեք չի կարող օրինական ակտ համարվել, քանի որ հիմք չունի, այսինքն՝ այդ թագադրման վերաբերյալ չկան ձայնագրություններ, չկան խոստովանական ցուցմունքներ կամ այլ մարդկանց ցուցմունքներ, չկան իրեղեն ապացույցներ․ հիմա, եթե Հայաստանում այդ օրենքն ընդունվի, ապա ինչն է խանգարում նախաքննությունը վարող քննիչին հարց դնել այս կամ այն անձի դեմ ՝ «դու օրենքով գող ես», այսինքն՝ քննիչի ուղիղ մեղադրանքը կարող է դառնալ վերջնական և այդ մարդն երբեք չի կարող ապացուցել, որ ինքը թագադրված չէ և այս դեպքում այդ քաղաքացին (որը հնարավոր է , որ իսկապես օրինազանց է, ասենք գողություն է կատարել) կհայտնվի ծանր իրավիճակում՝ 3 տարվա փոխարեն 10 կամ 15 տարի բերդում կնստի կամ էլ պետք է ծանոթ ճարի, «մարդ մեջ գցի» կամ էլ գումար տա, որ ազատվի․ ստացվում է, որ մենք այսպիսի օրենքով ուղիղ կխթանենք մի երևույթի, որի դեմ մեր կառավարությունն իբրև թե պայքարում է (նկատի ունի կոռուպցիան – խմբագրական), այսինքն հասկանալի է, որ այս օրենքը Հայաստանում չի աշխատի կամ կաշխատի սրանց համար (նկատի ունի իշխանություններին-խմբագրական), որ ում ուզենան մտցնեն «օրենքով գողի» հոդվածի տակ»,- «Առաջին լրատվական»-ի հետ զրույցում շեշտեց Գուրգեն Եղիազարյանը։

Հարցին՝ հնարավո՞ր է, որ Վրաստանում օրենսդրական այս խստացումից հետո «օրենքով գողերը» գան Հայաստան, Գուրգեն Եղիազարյանը պատասխանեց․

«Ոչ մի վտանգ չկա, որ նրանք կգան Հայաստան․ կարող ա ուղղակի գան կեր ու խումի կամ սխոդկայի և նրանք մեկ ժամ ավել էստեղ չեն մնա և դա շատ պարզ պատճառով՝ ի՞նչ էստեղ գողանան, ի՞նչ ա էստեղ մնացել, որ մի հատ էլ գողանան՝ ով պետք է արդեն գողացել-պրծել ա, իսկ այս գողերը թույլ չեն տա, որ էդ գողերը գան ու նրանք էլ իրենցից գողանան․ հենց որ սրանք իմանան, որ իրենցից պետք է գողանան, ապա երբեք Ծաղկաձորում «օրենքով գողերի» սխոդկա չի լինի, այնպես որ մենք այս առումով ապահովագրված ենք․ «օրենքով գողերը» կգնան այն երկիր, որտեղ բան կա տանելու կամ բան կա վաճառելու, թե չեն Հայաստան գալիս են ի՞նչ անեն, արդեն ամեն ինչ գողացած ա»։

Աղբյուրը` http://www.1in.am/2323039.html