Նրանք անընդհատ բաժանման եզրին են կանգնում, բայց նաև ամեն կերպ փորձում են ընտանիքը պահպանել. Իվետա Եդիգարյան
ՎԻԴԵՈLife.panorama.am-ի զրուցակիցն է դերասանուհի եւ երգչուհի Իվետա Եդիգարյանը, ով այս շրջանում ներկայանում է «Վերվարածները 2»-ում` «Անուղղելիներում», որտեղ Զիտայի կերպարով 9 տարի առաջ մեծ հայտնիություն ձեռք բերեց:
Այժմ նկարահանվում է սերիալի երկրորդ եթերաշրջանը: Իվետայի խոսքով`Զիտայի կյանքում շարունակվում է խառնաշփոթ տիրել.
«Իմ հերոսուհին մշտապես խառնաշփոթի մեջ է, նրա ամուսինը` Լիպոն, անընդհատ տարօրինակ իրավիճակներում է հայտնվում, որոնց պատճառով նրանք անընդհատ բաժանման եզրին են կանգնում, բայց նաեւ ամեն կերպ փորձում են ընտանիքը պահպանել, ինչը, նրանց պարագայում, իհարկե, դժվար է: Խառնաշփոթ է նաեւ Զիտայի մոր ընտանիքում, որովհետեւ նա Ճպլի հետ է, բայց նաեւ հանդիպում է ավելի երիտասարդ տղամարդու հետ, արդյունքում խանդի տեսարաններ եւ իսկական իրարանցում»,- պատմեց Իվետան:
Դերասանուհին դժվարացավ սիթքոմի հետ կապված առավել մանրամասներ հայտնել, քանի որ դեռ ինքն էլ հստակ չգիտի, թե ինչ է սպասվում «Անուղղելիների» հերոսներին:
Հարցին, թե դատելով արձագանքներից, սերիալը ինչպես 9 տարի առաջ սիրվե՞լ է հանրության կողմից, պատասխանեց.
«Քանի որ «Շանթի» ավանդական ալիքով հեռուստասերիալը չի ցուցադրվում, շատ շատերը նույնիսկ տեղյակ չեն, որ «Անուղղելիները» հեռարձակվում է: Եվրոպայում գտնվող հայեր կան, որ ինձ ֆիլմից կադրեր են ուղարկում ու գոհունակություն հայտնում: Բայց Հայաստանում բաց ցուցադրություն չլինելու պատճառով արձագանքները համեմատաբար քիչ են: Տարիներ առաջ, երբ ցուցադրվում էր «Վերվարածները», ընտանիքով՝ մեծից փոքր նայում էին: Հիմա որոշ մասը համացանցով է նայում, բայց դա ուրիշ է, հեռուստատեսությամբ ցուցադրությունը՝ ուրիշ, որովհետեւ ոչ բոլորն են, որ կարողանում են ինտերնետ մտնել ու նայել: Կարծես թե ծրագրեր կան, որ «Անուղղելիները» կցուցադրվի նաեւ «Շանթի» ավանդական ալիքով, ինչը, վստահ եմ, ավելի մեծ արձագանքների պատճառ կդառնա: Ամեն դեպքում, ես սիրով եմ գնում նկարահանումների, որովհետեւ հարազատ պրոյեկտ ենք վերադարձել եւ մեզանից յուրաքանչյուրը ջանք չի խնայում, որպեսզի արդյունքը լավ ստացվի»:
Իվետա Եդիգարյանը այս ընթացքում աչքաթող չի անում նաեւ երգչուհու կարիերան: Օրեր առաջ նա մոսկվաբնակ երգիչ Էդգար Գեւորգյանի հետ թողարկեց նոր տեսահոլովակ` «Իմ սիրտը քոնն է» երգի հիման վրա: Առջեւում նրանք դարձյալ համատեղ աշխատանքով կներկայանան;
«Մեր համատեղ աշխատանքի սկիզբը շատ հեշտ է ստացվել: Մի օր «Instagram»-ով ուղիղ եթեր էի դուրս եկել եւ Էդգարը նույնպես միացել էր իմ եթերին: Այդ պահին մոսկվաբնակ մեր երկրպագուներից մեկը հարցրեց, թե ինչո՞ւ համատեղ երգ չենք ձայնագրում: Կարծես թե հենց այդ հարցն էլ պատճառ դարձավ, որ մտածենք այդ ուղղությամբ: Այդ ժամանակ Էդգարին արդեն այս երգը տվել էին, եւ նա առաջարկեց այն միասին ներկայացնենք, արդյունքում ստեղծվեց մեր համագործակցությունը: Առաջին հաջող փորձից ու արձագանքներից ելնելով` որոշեցինք եւս մեկ երգ միասին թողարկել: Երգն արդեն կա, հեղինակը Աննա Հովներն է, չի բացառվում, որ երգը կունենա նաեւ տեսահոլովակ»,- նշեց երգչուհին:
Տարվա ընթացքում Իվետան կփորձի անհատական երգ եւս թողարկել, որն, իր խոսքով, ոճային կտրուկ տարբերություն կունենա:
Հարցին, թե ինչպե՞ս է հասցնում համատեղել դերասանական կարիերան եւ երգարվեստը, եւ դրանց զուգահեռ նաեւ ժամանակ տրամադրել դստերը, Իվետան նշեց, որ մեծ դժվարությամբ է հասցնում՝ ընդգծելով.
«Առավոտից երեկո նկարահանումների մեջ եմ, բայց հասցնում եմ նաեւ առողջ ապրելակերպ վարել` լողի գնալ, եւ անգլերեն եմ ուսումնասիրում, իսկ ահա երեկոյան՝ երգում եմ: Օրվա ընթացքում անպայման հասցնում եմ նաեւ ժամանակ անցկացնել դստերս հետ: Նա իր առօրյան հիմնականում անցկացնում է մայրիկիս հետ, բայց միասին անցկացրած ժամանակը թե ինձ, թե նրա համար ամենաթանկն է: Այդ պատճառով ես ամեն բան անում եմ, որպեսզի աղջկաս հետ շատ ժամանակ անցկացնեմ»:
Հեղինակ` Անուշիկ Մելքոնյան
