Լվովում հայերի եւ ադրբեջանցիների միջեւ միջադեպ. բողոքները հետ են վերցրել, քրգործը կարճվել է

Ուկրաինայի Լվով քաղաքում մայիսի 16-ին հայերի եւ ադրբեջանցիների միջեւ տեղի ունեցած միջադեպից ավելի քանի երկու ամիս անց միջադեպը հարթվել է:

«Քրեական գործը կարճվել է, բողոքները հետ են վերցրել ադրբեջանցիները: Խնդիրը հարթվեց»,- NEWS.am-ի թղթակցին ասաց Լվովի հայկական համայնքի ղեկավար Նիկոլայ Քոչարյանը:

Նշենք, որ հունիսի 30-ի դրությամբ 4 ադրբեջանցի էր հետ վերցրել բողոքը: Ադրբեջանցիներից մեկը հրաժարվում էր բողոքը հետ վերցնել:

Հիշեցնենք, որ Ուկրաինայի Լվով քաղաքում մայիսի 12-15-ն անցկացվող Կունգ-ֆուի Եվրոպայի առաջնության ժամանակ զանգվածային բախում է տեղի ունեցել Հայաստանի ու Ադրբեջանի ներկայացուցիչների միջեւ:

Արցախցի Դավիթ Պետրոսյանի մեծ առավելությամբ անցած մենամարտի վերջնամասում Ադրբեջանի թիմի մարտավկան փորձել է հարվածել հայ մարզիկին, որի վրա թիկունքից հարձակվել է նաեւ ռինգում գտնվող նրա ադրբեջանցի մրցակիցը: Դրանից հետո ադրբեջանական թիմի մարզիչներն ու մարզիկները մահակներով հարձակվել են Հայաստանի հավաքականի անդամների վրա:

Նշենք, որ հարձակման ենթարկված արցախցի մարզիկը ապրիլյան պատերազմի ժամանակ ադրբեջանական բանակի 5 տանկ եւ 1 ՀՄՄ խոցած ժամկետային զինծառայող Մարատ Պետրոսյանի եղբայրն է:

Մայիսի 16-ին, ըստ լրատվամիջոցների, հայերի եւ ադրբեջանցիների միջեւ տեղի է ունեցել բախում:

Բախումներից հետո իրավիճակը Լվովում բավականին լարված էր: