Միլանը պատրաստ է Դի Մարիայի համար 45 մլն եվրո վճարել ՊՍԺ-ին
ՍՊՈՐՏ
ՊՍԺ-ի կիսապաշտպան Անխել Դի Մարիան կարիերան կարող է շարունակել Իտալիայում:
Ինչպես տեղեկացնում է «Paris United»-ը, «Միլանը» հայտնի գործակալ Ժորժե Մենդեշին խնդրել է զբաղվել արգենտինացի ֆուտբոլիստի տրանսֆերի կազմակերպմամբ, որը գոհ չէ փարիզյան թիմում իր կարգավիճակից:
Նշվում է, որ վերջերս Մենդեշը հանդիպել է ՊՍԺ-ի մարզական տնօրեն Անտերու Էնրիկեին և հայտնել, որ «Միլանը» 45 մլն եվրո և բոնուսներ է առաջարկում Դի Մարիայի համար:
Ընթացիկ մրցաշրջանում 29-ամյա ֆուտբոլիստը Ֆրանսիայի առաջնության 7 հանդիպման է մասնակցել` դառնալով 1 գոլային փոխանցման հեղինակ:
Դի Մարիան 2015 թվականի օգոստոսից է հանդես գալիս ՊՍԺ-ում, ուր տեղափոխվել էր «Մանչեսթեր Յունայթեդից»: Արգենտինացու պայմանագիրը փարիզյան ակումբի հետ ուժի մեջ է մինչև 2019 թվականի ամառը:
