Նաիրիտի աշխատակիցների առաջարկն ընդունվեց. նորաստեղծ հանձնաժողովում նաեւ նաիրիտցիներ կլինեն

ՀՀ էներգետիկայի եւ բնական պաշարների նորանշանակ նախարար Լեւոն Յոլյանի առաջարկով Նաիրիտ գործարանի հարցրով զբաղվող նոր աշխատանքային հանձնաժողով է ստեղծվել՝ փոխնախարար Լեւոն Շահվերդյանի ղեկավարությամբ: Այդ մասին նախորդ շաբաթ ԱԺ-ում հայտարարել էր նաեւ Յոլյանը: Խմբում ընդգրկված են գործարանի նախկին ու ներկա տնօրենները, նախարարության մասնագետներ: Բանակցություններից հետո երեկ որոշում է կայացվել կատարել գործարանի աշխատակիցների պահանջը՝ աշխատանքային խմբում նաեւ գործարանի նախկին աշխատակիցներին ներառել:

Խմբում նախկին աշխատակիցներից ընդգրկվել են Արա Կարեյանը, Շավարշ Զարգարյանը, Գագիկ Ավետիսյանը, Արմեն Դեմիրճյանը եւ նախկին տնօրեն Կարեն Իսրայելյանը:

Նախարարի հետ երեկվա հանդիպման մասին խոսելով՝ Շավարշ Զարգարյանը մեզ հետ զրույցում ասաց, որ հադիպումը տեւել է շուրջ 2,5 ժամ, քննարկել են նաեւ այլ մասնագետների ներգրավելու հարցը: Մեր հարցին, թե ո՞րն է հանձնաժողովի նպատակը՝ Զարգարյանը պատասխանեց, որ իրենք պետք է Նաիրիտի վերագործարկման մասին հիմնավորումներ, փաստարկներ ներկայացնեն:

«Մենք մտածում ենք, որ Նաիրիտը անպայման պետք է վերագործարկվի եւ կաուչուկ արտադրի: Սա է մեր գլխավոր նպատակը: Նախարարը, փոխնախարարը եւս նորմալ են տրամադրված, նրանք էլ են մտածում, որ Նաիրիտն անպայման պետք է վերագործարկվի: Եվ Կառավարությունը պատրաստ է գնալ այնպիսի քայլերի, որ շահեկան պայմաններ ստեղծի եւ ներդրող գտնվի: Մեզ ասացին, որ եթե մենք էլ կարողանանք ներդրողներ գտնել, շատ լավ կլինի»,- մանրամասնեց գործարանի նախկին աշխատակիցը:

Մեր դիտարկմանը, որ ամեն նախարարի փոխվելու հետ նոր հանձնաժողով է ստեղծվում՝ ինչ երաշխիք կա, որ սա հերթականը չի լինելու՝ Զարգարյանը պատասխանեց.

«Չեմ կարող ասել՝ սա կլինի՞ հերթականը, թե ոչ: Նախարարը նոր է՝ ամեն դեպքում: Չես կարող մեղադրել, թե ինչու միանգամից լուծում չի տալիս: Այսօր մենք լուր ստացանք, որ նախարարն այցելել է գործարան: Նա փորձել է տեղում ծանոթանալ գործարանի վիճակին: Այնպես որ նրան էլ ժամանակ է հարկավոր խնդրին ծանոթանալու համար եւ եթե որոշ ժամանակ հետո էլ նորմալ առաջարկ չանի՝ այդ ժամանակ կարող ենք խոսել հերթականը լինելու մասին»,- ասաց Զարգարյանը:

Մեր հարցին ի պատասխան նա տեղեկացրեց նաեւ, որ 2 ամիս է տրվել, որ վերջնականապես ձեւավորվի հանձնաժողովը եւ որոշում կայացնի՝ անհրաժեշտ է վերագործարկել գործարանը, թե ոչ:

Հետաքրքրվեցինք՝ ձեւավորված խմբում կա՞ մարդ, որ համաձայն չէ վերագործարկմանը:

«Խմբում ընդգրկվածները բոլորը համակարծիք են, որ գործարանը ի վիճակի է վերագործարկվելու, աշխատելու: Մնում է ներդրողի հարցը լուծել: Կառավարությունը պետք է զբաղվի եւ գտնի մի ընկերություն, որը կզբաղվի գործարանի վերագործարկմամբ: Մինչեւ հիմա խանգարում էր այն հանգամանքը, որ փաստաթղթերը միջպետական բանկի մոտ էին: Հիմա Կառավարությունը դրանք հետ է վերցրել եւ գործարանը ըստ էության պետական է»,- պատասխանեց նա:

Աղբյուրը - Հայկական ժամանակ