Հայաստանում ծխախոտը թանկացնում են, որ բյուջեի մուտքերն ավելացնեն. Բաբկեն Պիպոյան

Սովորաբար պետությունները ծխախոտի ակցիզները թանկացնում են, որպեսզի նվազեցնեն սպառումը, քաջ գիտակցելով, որ դրա հետեւանքով բյուջեի մուտքերը նվազել են, իսկ Հայաստանում դա հերթական գործիքն է մուտքերն ավելացնելու համար:

Այս մասին, այսօր՝ հուլիսի 11-ին, լրագրողների հետ հանդիպման ժամանակ նշել է «Իրազեկ եւ պաշտպանված սպառող» ՀԿ նախագահ Բաբկեն Պիպոյանը՝ հավելելով, որ Հայաստանում թեեւ ծխախոտի գներն աճել են, սակայն սպառման ծավալները չեն նվազել:

Նրա խոսքով, ներկայումս ծխախոտի շուկայում տեղի են ունենում չարաշահումներ, մասնավորապես, նախկին էժան խմբաքանակը եւ ներկայիս խմբաքանակը վաճառվում է նույն թանկ գնով. «Ծխախոտի շուկայում 5-7 տոկոս գնաճ ունենք»:

Պիպոյանը կարծիք է հայտնել, որ ծխախոտի շուկան վերահսկողությունից դուրս է մնացել, անվտանգությունը, բաղադրությունը չի ստուգվում:

«Իրազեկ եւ պաշտպանված սպառող» ՀԿ-ի ղեկավարի ներկայացմամբ, պետք է իրական քայլեր կատարել ծխախոտի դեմ պայքարում, նոր օրենսդրական կարգավորումներ են անհրաժեշտ, իսկ ծխախոտի թանկացմանը ինքը դեմ է: