Հայաստանում ընդդիմությունը միավորվում է Փաշինյանի թիմի դեմ

ՀՀ խորհրդարանի ընդդիմադիր ուժերը հայտարարել են վարչապետ Նիկոլ Փաշինյանի գլխավորած գործող կառավարության դեմ միավորվելու մասին։ «Ուժեղ Հայաստան» խմբակցության նախագահ Նարեկ Կարապետյանը լրագրողներին պատմել է ընդդիմադիր կուսակցությունների համատեղ հայտարարության մասին, որում խոսվում է համազգային համախմբման մասին, որը, ըստ այդ քաղաքական գործչի, պայմանավորված է «հայ ժողովրդի և հայոց պետականության առջև ծառացած ճակատագրական մարտահրավերների ողջ լրջության գիտակցմամբ»։ Ինչպե՞ս կարող է ավարտվել հակակառավարական խորհրդարանական ուժերի այս «ապստամբությունը», և ինչպե՞ս կզարգանան պաշտոնական Երևանի հարաբերությունները ՀԱՊԿ անդամ պետությունների հետ այս ֆոնի վրա։ Քաղաքագետ, Քաղաքական տեղեկատվության կենտրոնի տնօրեն Ալեքսեյ Մուխինն է պատասխանել pnp.ru-ի հարցերին։

— Ալեքսեյ Ալեքսեևիչ, կարծո՞ւմ եք, որ Հայաստանում նոր ընդդիմադիր դաշինքի ի հայտ գալը կարող է փոխել Երևանի եվրոպամետ քաղաքականության վեկտորը։

— Ես գրեթե վստահ եմ, որ դա չի լինի։ Նախ ընդդիմության ներսում առկա անմիաբանության պատճառով, և երկրորդ, Փաշինյանի արդյունավետ (բացասական իմաստով, բայց այնուամենայնիվ) գործողությունների պատճառով։ Հայաստանի վարչապետը չի վարանում բանտարկել իրեն քննադատող քաղաքական գործիչներին, ձերբակալել և քրեական գործեր հարուցել իր հակառակորդների դեմ։

— Նարեկ Կարապետյանի հայտարարությունից անմիջապես հետո ձերբակալվեց «Ուժեղ Հայաստան» խմբակցության ղեկավար Սամվել Կարապետյանը։ Արդյո՞ք Հայաստանում կշարունակվեն բռնաճնշումները։

— Այո, ցավոք։ Աշխարհում, ընդհանուր առմամբ, ոչ ոք, բացի Ռուսաստանից, դա չի նկատում։ Եվ արևմտյան երկրներում Փաշինյանը դեռևս համարվում է «դեմոկրատ» առաջնորդ, ինչը ծիծաղելի կթվար, եթե այդքան տխուր չլիներ։ Եվ ինչո՞ւ պետք է նա դադարեցնի անել այն ինչն արդյունավետ է համարում սեփական իշխանությունը պահպանելու համար։ Հարցը, իհարկե, հռետորական է։

— Ձեր կարծիքով, Հայաստանի ընդդիմադիր ուժերը կարո՞ղ են ունենալ որևէ արտաքին աջակցություն։

— Ոչ, առայժմ սա միայն ներքին հայկական հարց է։ Նրանք, ովքեր որևէ արտաքին կապեր ունեին կամ լքել են Հայաստանը, կամ դադարեցրել են մասնակցել քաղաքականությանը։

— Հավաքական անվտանգության պայմանագրի կազմակերպության գլխավոր քարտուղար Թաալաթբեկ Մասադիկովը վերջերս հայտարարել է, որ Հայաստանը կարող է զրկվել Կազմակերպության շրջանակներում իր քաղաքացիներին քվոտային պաշտոններում առաջադրելու, ինչպես նաև ՀԱՊԿ մարմիններում քվեարկելու իրավունքից անդամավճարները չվճարելու պատճառով։ Նոյեմբերի 5-ին ճեպազրույցի ժամանակ Փաշինյանը հայտարարել է, որ «մեր հետաքրքրությունը ՀԱՊԿ-ի նկատմամբ մարել է»։ Ինչպե՞ս և ե՞րբ կավարտվի այս հակամարտությունը։

— Հայաստանը նախատեսում է 2027 թվականին դիմել ԵՄ անդամակցության համար, որից հետո ՀԱՊԿ-ին և Եվրասիական տնտեսական միությանը նրա մասնակցության հարցը կփակվի։ Սա նշանակում է, որ Հայաստանը պատմության մեջ առաջին երկիրը կլինի, որը պարզապես կհեռացվի ՀԱՊԿ-ից: Նման բան երբեք չի եղել, բայց այսօրվա Երևանի համար, ինչպես ես եմ հասկանում, ամենայն հավանականությամբ կմշակվի «բացառիկ» մոդել։

— Արդյո՞ք Հայաստանի անդամակցությունը ԵՄ-ին ավարտված գործ է։

–Հայաստանը շարժվում է այդ ուղղությամբ, և դեռևս որևէ խոչընդոտ չկա։ Չնայած այն հանգամանքին, որ Փաշինյանի գործողությունները ակնհայտորեն քիչ կապ ունեն «եվրոպական ժողովրդավարական արժեքների» հետ, ԵՄ-ն իր լիակատար համաձայնությունն է հայտնում Փաշինյանի արածների հետ (ներառյալ նրա հակառակորդների ձերբակալությունը)։

— Ի՞նչ եք կարծում, ի՞նչ կպատահի Ռուսաստանի և Հայաստանի հարաբերություններում մոտ ապագայում։

— Ակնհայտ է, որ հարաբերությունները գնալով ավելի կլարվեն։ Սա կազդի բոլոր ոլորտների վրա։ Մենք նկատում ենք, թե ինչպես են Ռուսաստանի իշխանությունները աստիճանաբար կրճատում Հայաստանի հետ առևտրի ծավալները, փոխգործակցության ոլորտները և այլն։ Ես կարծում եմ, որ սա անխուսափելիի նախապատրաստություն է. Փաշինյանի գլխավորությամբ Հայաստանը շարժվում է դեպի տարածաշրջանում փաստացի ԵՄ ֆորպոստ դառնալը։ Ակնհայտ է, որ ինքնիշխան քաղաքականության բացակայության պայմաններում այդ ֆորպոստը կգոյատևի սուբսիդիաների շնորհիվ։

— Կարո՞ղ է դա դառնալ Ռուսաստանի անվտանգության նոր մարտահրավեր։

— Իմ կարծիքով այո։ Ես կարծում եմ, որ Փաշինյանը, երբ որոշի իր «Եվրամիության» ապագան, կփորձի դուրս մղել ռուսական ռազմաբազան Հայաստանից և փոխարինել այն ՆԱՏՕ-ի բազայով։ Սա, անշուշտ, մարտահրավեր է, բայց ես համոզված եմ, որ Ռուսաստանը պատրաստ է դրան։

Նյութը հրապարակման պատրաստեց Կամո Խաչիկյանը

www.1or.am