«Հայաստանի նոր Սահմանադրության համար պայքարը հասել է դատարան»

ՀՀ կոռուպցիայի դեմ պայքարի դատարանը մեկամսյա նախնական կալանքի տակ է առել Սամվել Կարապետյանին՝ ընդդիմադիր «Ուժեղ Հայաստան» կուսակցության առաջնորդին։ Քննչական կոմիտեի տվյալներով ընդդիմադիր գործիչը 2016-2024 թվականներին իր «Հայաստանի էլեկտրական ցանցեր» (ՀԷՑ) ընկերությանը պատճառել է 64,5 միլիարդ դրամի (178,8 միլիոն դոլար) վնաս։ Ընդդիմությունը պնդում էր, որ Հայաստանի կառավարությունը գործում է Ադրբեջանի հրամաններով և կոչ է արել ազգին պայքարել կառավարության դեմ, գրում է ng.ru–ն։ Իրավապահ մարմինների աշխատակիցները պնդում են, որ Կարապետյանը չարաշահել է իր պաշտոնական դիրքը խոշոր չափի հափշտակություններ և փողերի լվացում կատարելու համար։ Նրանց հետաքննության համաձայն ընկերության գործունեությունը ֆինանսավորվել է անհրաժեշտից ավելի փոխառություններ վերցնելով, որոնք հետագայում անհիմն կերպով վճարվել են բաժնետերերին որպես դիվիդենտներ կամ փոխանցվել են տարբեր կազմակերպությունների։ Կարապետյանից բացի, այս գործով ձերբակալվել է ևս 35 անձ։ 

Հիշեցնենք, որ դեռ 2025 թվականի հունիսի կեսերին էր Կարապետյանը ձերբակալվել  պետական ​​հեղաշրջում հրահրելու մեղադրանքով, ավելի կոնկրետ վարչապետ Նիկոլ Փաշինյանի հարձակումներից Հայ Առաքելական Եկեղեցին «իր ձևով» պաշտպանելու խոստման պատճառով։ Կարճ ժամանակ անց օլիգարխից ՀԷՑ-ն առգրավվել էր։ «Ուժեղ Հայաստան»-ը կարծում է, որ քրեական հետապնդման վերջին փուլը կապված է Փաշինյանի հնարավորինս արագ նոր Սահմանադրություն ընդունելու ցանկության հետ։ Վարչապետը խոստացել էր հրապարակել օրենքի նախագիծը և ընդդիմությանը առաջարկել է այնպիսի առաջարկ, որը նրանք չեն կարող մերժել, իսկ եԵթե կառավարության հակառակորդները չփոխեն իրենց միտքը, ապա նա սպառնացել էր հասարակության և իշխանությունների համատեղ ճնշմամբ։ «Սամվել Կարապետյանին կրկին ձերբակալելու այսօրվա որոշումը ևս մեկ անգամ ապացուցում է, որ Հայաստանի պետական ​​կառույցները կատարում են Փաշինյանի հրամանները, - հայտարարել է «Ուժեղ Հայաստան»-ը,–ընդամենը մի քանի օր առաջ Փաշինյանը հրապարակավ սպառնացել էր այն ընդդիմադիր առաջնորդներին, ովքեր դեմ են «ալիևյան  Սահմանադրությանը», իսկ հիմա Սամվել Կարապետյանը կրկին ձերբակալվել է։ Ալիևը թուլացնում է Հայաստանը դրսից, իսկ Փաշինյանը ներսից։ Կրկին ձերբակալելով Կարապետյանին Փաշինյանը փորձում է օգտագործել հակաժողովրդավարական մեթոդներ «ալիևյան Սահմանադրության» ընդունումը պարտադրելու համար։ Նա նույնը արեց 2025 թվականին և ձախողվեց»։ Հիմա Փաշինյանը կրկին կձախողվի։ Նա չի կարողանա պարտադրել «ալիևյան Սահմանադրությունը», քանի որ հայ ժողովուրդը դեմ է դրան, և միավորված ընդդիմությունը չի նահանջի ճնշման տակ»։ 

Հայաստանում նոր Սահմանադրությունը կարող է ընդունվել միայն հանրաքվեով, բայց դրա ընդունումը պետք է հաստատվի 70 պատգամավորի կողմից։ Իշխող «ՔՊ» կուսակցությունն ունի ընդամենը 64 մանդատ։ Փաշինյանը անգամ պնդում է, որ պատրաստ է արտահերթ խորհրդարանական ընտրություններ նշանակել որպես վերջին միջոց։ Ազգային ժողովում կան երեք քաղաքական ուժեր՝ Փաշինյանի «ՔՊ»–ն, Կարապետյանի «Ուժեղ Հայաստան»-ը և երկրորդ նախագահ Ռոբերտ Քոչարյանի «Հայաստան» կուսակցությունը։ Քոչարյանի պատգամավորները կտրականապես են հրաժարվում աջակցել Ադրբեջանի հետ նախաստորագրված խաղաղության պայմանագրին, նոր Հիմնական օրենքի ընդունման գաղափարին կամ «Թրամփի ճանապարհին»։ Նրանք դրանք համարում են հանրապետությունը Ադրբեջանի և Թուրքիայի խամաճիկ պետության վերածելու նշաններ։ Կարապետյանի պատգամավորները, ընդհակառակը, աջակցում են Բաքվի հետ խաղաղության երկխոսությանը և «Թրամփի ճանապարհի» կառուցմանը հավատալով, որ դրանք պետք է զարգանան միասին, այլ ոչ թե առանձին։ Միևնույն ժամանակ, «Ուժեղ Հայաստան»-ը կարծում է, որ Երևանը չափազանց շատ զիջումների է գնում բանակցություններում վտանգելով, որ վերջնական արդյունքում կկորցնի իր անկախությունը։ Նրանք նաև համոզված են, որ Փաշինյանը ցանկանում է փոփոխություններ կատարել Սահմանադրության մեջ Ալիևի պահանջով, ով ուղղակիորեն կոչ է արել հանել Անկախության հռչակագիրը Սահմանադրությունիցնախաբանից։ «ՔՊ»-ն մերժում է նման պնդումները։ Ըստ Փաշինյանի, հռչակագիրը Սահմանադրությունում իսկապես չպետք է հիշատակվի, ոչ թե որովհետև Ալիևն է այդպես ասել, այլ որովհետև այն թշնամական միջավայր է ստեղծում Հայաստանի շուրջ։ Իշխող կուսակցությունը նաև կարծում է, որ «Թրամփի ճանապարհը» կարող է զարգանալ անկախ խաղաղության պայմանագրի առկայությունից, քանի որ Բաքվի հետ տնտեսական համագործակցությունն ինքնին կամրապնդի անվտանգությունը և փոխըմբռնումը։

Անկախ ամեն ինչից Քոչարյանն ու Կարապետյանը բանտում են կոռուպցիայի մեղադրանքներով։ «Ուժեղ Հայաստանի» առաջնորդի վերջին ձերբակալությունից հետո ընդիմադիր կազմակերպությունները որոշել են դաշինք կազմել Փաշինյանի դեմ և հայտարարել են համազգային համախմբման մասին։ Նրանց են միացել «Ազատություն», «Ապրելու երկիր», «Բարգավաճ Հայաստան», «Ժողովրդավարական այլընտրանք», «Հայ ազգային կոնգրես», «Դաշնակցություն», «Հայաքվե», «Հայաստանի հանրապետական», «Հայաստանը ես եմ», «Ժառանգություն» և «Նոր դարաշրջան» կուսակցությունները։ Իրենց նպատակների թվում նրանք նշել են «ալիևյան Սահմանադրության» մերժումը, խաղաղության հաստատումը առանց միակողմանի զիջումների և տարածքային կորուստների, ազգային ինքնության և Հայ Առաքելական եկեղեցու պաշտպանությունը և ժողովրդավարության վերականգնումը։

«Մենք տեսնում ենք, որ այսօր հիմնական խնդիրները տարածքային զիջումներն ու «ալիևյան Սահմանադրությունն» են։ Ես կոչ եմ անում բոլոր հասարակական գործիչներին միավորվել այս գաղափարների շուրջ։ Մենք կարող ենք տարբեր ճանապարհներ ընտրել և տարբեր առաջնահերթություններ ունենալ, բայց մենք պետք է միավորվենք այս սկզբունքների շուրջ և կանխենք «ալիևյան Սահմանադրության» ներդրումը Հայաստանում և երկրի վերածումը Ալիևի արբանյակ պետության», - հայտարարել է Նարեկ Կարապետյանը։

Նյութը հրապարակման պատրաստեց Կամո Խաչիկյանը

www.1or.am