Թրամփ․ ԱՄՆ-ը պետք է «շատ զգույշ» լինի Ուկրաինային Patriot հրթիռների արտադրության լիցենզիա փոխանցելու հարցում
ՄԻՋԱԶԳԱՅԻՆ
ԱՄՆ նախագահ Դոնալդ Թրամփը հայտարարել է, որ Վաշինգտոնը պետք է «շատ մեծ զգուշություն» ցուցաբերի Ուկրաինային Patriot հակաօդային պաշտպանության համակարգերի համար հրթիռների արտադրության լիցենզիա տրամադրելու հարցում։
«Սա անհավանական զենք է։ Մենք պետք է շատ զգույշ լինենք՝ թույլ տալով որևէ մեկին այն արտադրել», — ասել է Թրամփը՝ պատասխանելով լրագրողների հարցին։
Հայտարարությունը հնչել է Թրամփի՝ Սպիտակ տանը Ուկրաինայի նախագահ Վլադիմիր Զելենսկու հետ հանդիպումից մի քանի օր անց։ AFP-ի փոխանցմամբ՝ բանակցությունները տևել են ավելի քան մեկ ժամ՝ Ռուսաստանի և Ուկրաինայի միջև փոխադարձ հեռահար հարվածների ուժեղացման ֆոնին, այն բանից հետո, երբ ԱՄՆ-ի աջակցությամբ պատերազմի դադարեցմանն ուղղված դիվանագիտական ջանքերը փակուղի են մտել։
Հանդիպումից հետո Զելենսկին հայտարարել է, որ Թրամփը համաձայնել է Ուկրաինային տրամադրել Patriot հրթիռների արտադրության լիցենզիա։
Սակայն ամերիկացի առաջնորդը միայն նշել է, որ կողմերը քննարկել են «շատ հարցեր», և որ հանդիպումը «շատ լավ է անցել»՝ ուղղակիորեն չհաստատելով նման համաձայնության ձեռքբերումը։
ՄԱԿ-ի տվյալներով՝ անցած ամիսը դարձել է ամենամահաբերն Ուկրաինայի քաղաքացիական բնակչության համար 2022 թվականի ապրիլից ի վեր։
Դա պայմանավորված է նրանով, որ Ռուսաստանը զգալիորեն մեծացրել է բալիստիկ հրթիռների կիրառումը, որոնք առկա հակաօդային պաշտպանության միջոցներով զգալիորեն ավելի դժվար է որսալ։
