Փարիզի մերձակայքում hրդեհի մարումը կարող է մի քանի շաբաթ տևել. Ֆրանսիայի hրշեջ-փրկարարական ծառայության պաշտոնական ներկայացուցիչ

Ֆոնտենբլո կոմունայի մերձակայքում ավելի քան 2,000 հա տարածք ընդգրկած անտառային հրդեհի լիակատար վերացումը կարող է մի քանի շաբաթ տևել։ Այս մասին հայտնել է Ֆրանսիայի հրշեջ-փրկարարական ծառայության ազգային ֆեդերացիայի պաշտոնական ներկայացուցիչ Ֆրանսիս Կոման, հաղորդում է ՏԱՍՍ-ը:

«Առաջին գիշերը կրակը հաղթահարել է 400 մ, ուստի այժմ ընթանում է օջախների որոնում։ Գործընկերները կատարում են մանրակրկիտ աշխատանք, և մասամբ այդ պատճառով հրդեհի մարումը կարող է շարունակվել մի քանի շաբաթ», - հայտարարել է նա:

Ինչպես նշում է հեռուստաալիքը, այժմ հրշեջներն օգտագործում են ջերմատեսիլներով անօդաչու սարքեր՝ այն հատվածները հայտնաբերելու համար, որտեղ շարունակվում է թխկացումը կամ այրումը։ Ֆրանսիայի ՆԳՆ ղեկավար Լորան Նունյեսը հայտարարել է, որ հրդեհը տեղայնացված է, և կրակը այլևս չի տարածվում, գործողություններում ներգրավված են ավելի քան 800 հրշեջներ, ինչպես նաև 4 ինքնաթիռ և մի քանի ուղղաթիռ։

Փարիզից մոտավորապես 70 կմ հարավ գտնվող Ֆոնտենբլո կոմունայի մերձակայքում խոշոր բնական հրդեհը սկսվել է հուլիսի 12-ին։ Մի քանի օրվա ընթացքում դրա տարածքը գերազանցել է 2,000 հա-ն, ինչը կազմում է այդ կոմունայի մոտ գտնվող անտառային զանգվածի ընդհանուր տարածքի գրեթե 10%-ը։

Կրակի տարածմանը նպաստել են ուժեղ քամին և շոգ եղանակը։ Ինչպես ավելի վաղ հայտնել էր Նունյեսը, իշխանությունները կասկածում են, որ Ֆոնտենբլոյի շրջանում հրդեհը կարող էր տեղի ունենալ դիտավորյալ հրկիզման պատճառով, առայժմ ձերբակալվել են 18 և 20 տարեկան երկու կասկածյալներ։