ԱԱ-2026․ Ֆրանսիան հաղթեց Սենեգալին, իսկ Մբապեն` լավագույն ռմբարկու

Աշխարհի 2026 թվականի առաջնության առաջին տուրի I խմբի մեկնարկային խաղում, ԱՄՆ-ի Նյու Ջերսի նահանգի Իստ Ռադերֆորդ քաղաքի «ՄետԼայֆ» մարզադաշտում, Ֆրանսիայի հավաքականը 3-1 հաշվով վստահ հաղթանակ տարավ Սենեգալի ընտրանու նկատմամբ։

Հանդիպման հաշիվը 66-րդ րոպեին բացեց թիմի ավագ Կիլիան Մբապեն։ Ֆրանսիացիների առավելությունը 82-րդ րոպեին կրկնապատկեց փոխարինման դուրս եկած Բրեդլի Բարկոլան, որն աչքի ընկավ Ադրիեն Ռաբիոյի փոխանցումից հետո։

Խաղի վերջնամասն աչքի ընկավ անչափ դրամատիկ զարգացումներով։ 90+5-րդ րոպեին Իբրահիմա Մբայեն կրճատեց հաշվի տարբերությունը՝ խփելով սենեգալցիների միակ գնդակը։ Սակայն ընդամենը մեկ րոպե անց՝ 90+6-րդ րոպեին, Կիլիան Մբապեն հեռահար շքեղ հարվածով դուբլ ձևակերպեց՝ դնելով հանդիպման վերջակետը։

Այս գոլը պատմական էր հարձակվողի համար. այն Մբապեի 58-րդ գնդակն էր ազգային թիմի կազմում, ինչի շնորհիվ նա շրջանցեց Օլիվիե Ժիրուին և դարձավ Ֆրանսիայի հավաքականի պատմության բոլոր ժամանակների լավագույն ռմբարկուն։ Բացի այդ, հարձակվողն իր գոլերի քանակն աշխարհի առաջնություններում հասցրեց 14-ի։

Հաջորդ տուրում Ֆրանսիայի հավաքականը հունիսի 23-ին կմրցի Իրաքի, իսկ Սենեգալը նույն օրը՝ Նորվեգիայի ընտրանու հետ։