ՆԱՏՕ-ում քննարկում են Ուկրաինային 70 միլիարդ եվրոյի ֆինանսական օգնության փաթեթը․ Politico
ՏՆՏԵՍՈՒԹՅՈՒՆ
ՆԱՏՕ-ի երկրները քննարկում են Ուկրաինային ռազմական կարիքների համար 70 միլիարդ եվրոյի ֆինանսական օգնություն տրամադրելու նախաձեռնությունը, որի մասին կարող է հայտարարվել հուլիսին Անկարայում կայանալիք դաշինքի առաջնորդների գագաթնաժողովի ժամանակ։ Այս մասին, հղում անելով աղբյուրներին, գրում է Politico պարբերականը, հաղորդում է ՏԱՍՍ-ը։
Ընդ որում, ընդհանուր գումարից միայն 40 միլիարդ եվրոն կլինեն ֆինանսավորման նոր պարտավորություններ։ Մնացած 30 միլիարդ եվրոն Եվրամիության 90 միլիարդ եվրո ծավալով օգնության փաթեթի մի մասն է։
«Դա բնական է, քանի որ ՆԱՏՕ-ի դաշնակիցների մեծ մասը նաև ԵՄ անդամ են։ Անարդար կլինի նրանցից խնդրել օգնություն հատկացնել երկու անգամ»,- ասել է պարբերականի զրուցակիցներից մեկը։
Նախաձեռնությունը մայիսին առաջադրել է Գերմանիայի կառավարությունը։ Այն նախատեսում է նոր մեխանիզմների ստեղծում՝ բարձրացնելու թափանցիկությունն այն հարցում, թե ինչպիսի ավանդ է ներդնում երկրներից յուրաքանչյուրը։ Ինչպես պարզաբանում է պարբերականը, նախկինում Եվրոպայի որոշ երկրներ դժգոհում էին, որ Կիևին աջակցելու անհամաչափ բեռ են կրում։
«Խնդիրն այն է, որպեսզի մենք Անկարայի գագաթնաժողովի արդյունքներով հաստատուն պարտավորություն ունենանք՝ շարունակելու Ուկրաինայի աջակցությունը ավելի կայուն և արդարացի հիմքերով»,- ասել է պարբերականի զրուցակիցներից մեկը։
Ինչպես գրում է պարբերականը, Ուկրաինայի աջակցությունը կարող է դառնալ հուլիսի 7-8-ը կայանալիք ՆԱՏՕ-ի առաջնորդների գագաթնաժողովի առանցքային թեմաներից մեկը։
«Քննարկումներ են գնում այն մասին, թե ինչպես ենք շարունակելու ՆԱՏՕ-ի վճռական աջակցությունը Ուկրաինային և դրա հետ մեկտեղ երաշխավորելու բեռի արդարացի բաշխումը»,- պարբերականին հայտնել է դաշինքի ներկայացուցիչը։
Ավելի վաղ դաշինքի գլխավոր քարտուղար Մարկ Ռյուտեն անդամ երկրներին առաջարկում էր կանոնավոր կերպով հատկացնել ՀՆԱ-ի 0,25%-ը՝ Ուկրաինային աջակցելու համար, սակայն այդ գաղափարը մերժվել էր։ Այժմ կազմակերպությունում կենտրոնացած են գերմանական նախաձեռնության վրա։ Պարբերականի զրուցակիցները նշել են, որ քննարկումները գտնվում են նախնական փուլերում, բայց միևնույն ժամանակ մատնանշում են, որ համաձայնությունը կարող է ձեռք բերվել շուտով՝ պաշտպանության նախարարների հանդիպմանը, որը կկայանա ավելի ուշ՝ հունիսին։
