Եթե նման օրենք կա, ուրեմն դու արդեն ինքդ ես հարցը կտրուկ դրել, բայց այդ դեպքում եկեք պատասխանատու լինենք մեր խոսքերի համար և դիմենք ժողովրդին. Լավրովը՝ ՀՀ-ի ԵՄ-ին անդամակցության մասին

Եթե նման օրենք կա, ուրեմն դու արդեն ինքդ ես հարցը կտրուկ դրել, բայց այդ դեպքում եկեք պատասխանատու լինենք մեր խոսքերի համար և դիմենք ժողովրդին: Այս մասին Իզվեստիա-ին տված հարցազրույցում հայտարարել է ՌԴ արտաքին գործերի նախարար Սերգեյ Լավրովը՝ խոսելով Հայաստանի Հանրապետության ԵՄ-ին անդամակցության մասին:

«Այժմ հարևան Հայաստանը նույնպես անցնում է եվրոպական միության այս՝ «կա՛մ-կա՛մ, ընտրե՛ք» կլիշեի փորձությունը։ Նախագահ Պուտինն այս թեմայով շատ մանրամասն խոսել է նաև մայիսի 9-ի մամուլի ասուլիսում. Հայաստանն ինքը պետք է որոշի, ինքը պետք է ընտրություն կատարի՝ ցանկանո՞ւմ է մնալ ԵԱՏՄ-ում, թե՞ միանալ ԵՄ-ին, մենք հարգելու ենք հայ ժողովրդի ցանկացած ընտրություն, բայց թող այդ ընտրությունը կատարվի»,- ասել է նա։

Լավրովի խոսքով՝ եթե Երևանն արդեն օրենք է ընդունել ԵՄ-ին պաշտոնական մերձեցման գործընթաց սկսելու մասին, նշանակում է՝ Հայաստանի իշխանություններն իրենք են հարցը կտրուկ դրել։

«Եթե նման օրենք կա, ուրեմն դու արդեն ինքդ ես հարցը կտրուկ դրել, բայց այդ դեպքում եկեք պատասխանատու լինենք մեր խոսքերի համար և դիմենք ժողովրդին»,- ընդգծել է նախարարը։

Հիշեցնենք, որ մարտին Հայաստանի խորհրդարանն ընդունել է Եվրամիությանը երկրի անդամակցության գործընթացը սկսելու մասին օրինագիծ։ Միևնույն ժամանակ, Փաշինյանն ավելի վաղ հայտարարել էր, որ ԵՄ-ին Հայաստանի հնարավոր անդամակցությունը պետք է դառնա ժողովրդական կամարտահայտության առարկա։