Դեսպան Աղաջանյան. Հայաստանին խնդրում են նստել ԵՄ–ի խորտակվող «Տիտանիկ»–ը

Եվրամիության հետ մերձեցման գործընթացը, ըստ էության, ՆԱՏՕ-ի ուղղությամբ քայլ է։ Այդ մասին հայտարարել է Հայաստանի արտակարգ և լիազոր դեսպան Ձյունիկ Աղաջանյանը, գրում է EADaily.com–ը։

«Ես համաձայն չեմ, որ Եվրամիությանը միանալու գործընթաց չկա։ Նման գործընթաց տեղի է ունենում եվրոպական հովանոցի ներքո։ Սրանք պարզապես խոստումներ չեն, այլ իրական գործողություններ, որոնցից շատերը տեղի են ունենում կուլիսների հետևում։ Ըստ էության, խոսքը Եվրոպայի մասին չէ, այլ ՆԱՏՕ-ի։ Խոսք է գնում աստիճանաբար ՆԱՏՕ-ի հովանոցի ներքո անցնելու մասին», - ընդգծել է դիվանագետը։

Աղաջանյանը նշել է, որ վերջին տարիներին հայկական պաշտպանական բլոկը ակտիվորեն ընդունում է ՆԱՏՕ-ի չափանիշները սկսած ծրագրերից և փողկապներից մինչև համազգեստ։ «Մենք գնում ենք ճիշտ նույն ճանապարհին, ինչ Ուկրաինան և Մոլդովան։ Սա Հայաստանը ՆԱՏՕ-ի հովանոցի ներքո դնելու լիարժեք գործընթաց է», - ասել է նա։

Դեսպանը հիշեցրել է, որ Ռուսաստանն արդեն տեսել է նման քաղաքականության հետևանքները Ուկրաինայում և Վրաստանում, նաև նմանատիպ փորձերը շարունակվում են Կենտրոնական Ասիայում։ «Գլխավոր նպատակը Ռուսաստանին թշնամական գոտիով շրջապատելն է։ Նրանք նախընտրում են կռվել միջնորդավորված ինչպես Ուկրաինայում, որտեղ միլիոնավոր մարդիկ զոհվում են Եվրոպայի նեոգաղութատիրական նկրտումների համար: Եվ նրանք փորձում են նույնը անել նաև Հայաստանի հետ։ Հենց դրա համար էլ Արցախը զոհաբերվեց. այն այս ծրագրի շրջանակներում խոստացվել էր Ադրբեջանին որպես բոնուս», - հայտարարել է Աղաջանյանը։ Նա նաև նշել է, որ ներկայիս Հայաստանի իշխանությունները, լինելով Արևմուտքի հովանավորյալներ, հետևողականորեն վատթարացնում են հարաբերությունները Ռուսաստանի հետ երկիրը հակառուսական ամրոցի վերածելու համար։

Խնդրի տնտեսական կողմի մասին խոսելով դեսպանը հիշեցրել է, որ ԵԱՏՄ-ն և ԵՄ-ն երկու անհամատեղելի բլոկներ են՝ տարբեր օրենսդրությամբ։ «Դուք չեք կարող միաժամանակ երկու տեղում լինել և վայելել երկու միությունների արտոնությունների ամբողջական փաթեթը», - բացատրել է նա։

Միևնույն ժամանակ, Աղաջանյանը նշել է, որ ԵՄ-ն այլևս չի ընկալվում որպես լուրջ տնտեսական, քաղաքական և ռազմական բևեռ։ «Դա Տիտանիկ է, որը վաղուց բախվել է սառցաբեկորին։ Այն հիմա խորտակվում է։ Եվրոպայի վերջին քայլերը՝ պատերազմի դիմելու և Ռուսաստանի հետ ինքնասպանական դիմակայությունը շարունակելու փորձերը, միայն արագացնում են դրա փլուզումը»,– ասել է նա։ Նրա խոսքով համաշխարհային զարգացման ապագան առնվազն հաջորդ երեք-չորս տասնամյակների ընթացքում Արևելքում է։ Նույնիսկ ԱՄՆ նախագահ Դոնալդ Թրամփն է փորձում բարելավել հարաբերությունները Չինաստանի հետ տնտեսական շահույթի նպատակով։ «Եվ մեզ խնդրում են դուրս գալ ԵԱՏՄ-ից և հրաժարվել բոլոր իրական հնարավորություններից եվրոպական պատրանքների և վարդագույն բանտիկների համար, որոնք ոչ այլ ինչ են, քան մեր սեփական ժողովրդի ոչնչացումը», - եզրափակել է Աղաջանյանը։

Նյութը հրապարակման պատրաստեց Կամո Խաչիկյանը

www.1or.am