Փաշինյանն անցել է բացահայտ սպառնալիքների

Խորհրդարանական ընտրությունների քարոզարշավի ընթացքում վարչապետի պաշտոնը զբաղեցնող Նիկոլ Փաշինյանն անցել է հիմնական ընդդիմախոսներին բացահայտ սպառնալուն՝ խոստանալով ընտրվելու դեպքում ունեզրկել նրանց։

Եթե նախկինում Փաշինյանը հայտարարում էր Սամվել Կարապետյանին ունեզրկելու մտադրության մասին, ապա հիմա նրա թիրախում նաև «Բարգավաճ Հայաստան» կուսակցության նախագահ Գագիկ Ծառուկյանն ու երկրորդ նախագահ Ռոբերտ Քոչարյանն են։

Երեկ Շիրակի մարզում նա հայտարարել է, թե մինչև 2031 թվականը Գագիկ Ծառուկյանի սարի գլխի տունը պետք է ծերերի խնամքի կենտրոն դառնա։ «Այնպես, ինչպես փեսայի՝ Գուլոյանի տունն արդեն պետության սեփականությունն է՝ 2,5 մլն դոլար արժողությամբ»,- ասել է Փաշինյանը։ Նա հավելել է, թե Ծառուկյանը, Կարապետյանն ու Քոչարյանը ունեզրկվելու են։

«Ես ասել եմ՝ Ծառուկյանը, Կարապետյանը, Ռոբերտը, ոնց որ երկու բոթասից սկսել են՝ ձեր աջակցությամբ ես իրենց հասցնելու եմ երկու բոթասի»,- ասել է Փաշինյանը։

Ցանկացած նորմալ, այդ թվում՝ եվրոպական պետությունում այսպիսի հայտարարություններից հետո նրան ոչ միայն կհեռացնեին ընտրապայքարից, այլև կձերբակալեին, բայց Հայաստանում Փաշինյանը ոչ միայն շարունակում է քարոզարշավը, այլև եվրոպական կառույցները համառորեն հրաժարվում են գնահատական տալ նրա հայտարարություններին։

Մինչդեռ մասնավոր սեփականությունը նույն Արևմուտքում անձեռնմխելի է, իսկ Ծառուկյանի, Կարապետյանի, Քոչարյանի ունեցվածքի՝ ապօրինի լինելու մասին դատարանի որևէ վճիռ գոյություն չունի։ Միայն հայտարարություններ են ու դատարաններում ձախողվող մեղադրանքներ։

Արդյունքում, Հայաստանը մեծ քայլերով գլորվում է բռնապետություն, որտեղ անգամ մասնավոր սեփականությունն անվտանգ չէ։

Սոնա Գալստյան