Իրանի կառավարությունում ընդունել են ապրանքների գների կտրուկ բարձրացման փաստը․ Al Jazeera
ՏՆՏԵՍՈՒԹՅՈՒՆ
Իրանի ներքին գործերի նախարարության բարձրաստիճան պաշտոնյան խոստովանել է ապրանքների գների կտրուկ բարձրացումը՝ դա մասամբ բացատրելով ներքին գործոններով, ինչպես նաև շարունակվող պատերազմով, հայտնում է Al Jazeera հեռուստաալիքը։
«Որոշ ապրանքների գների աճն ապշեցուցիչ է, և դա հնարավոր չէ հերքել,- ասել է Իրանի ՆԳՆ մամուլի քարտուղար Ալի Զեյնիվանդը։- Ես իսկապես չեմ ցանկանում հիմա ամեն ինչ բարդել պատերազմի վրա և ասել, թե դա պատերազմի պատճառով է։ Մասամբ դա կարող է կապված լինել նաև մեր ելույթների հետ»։
Զեյնիվանդի խոսքով՝ իշխանությունները հստակեցրել են այն ոլորտները, որտեղ հնարավոր է վերահսկել գները և որտեղ հետևանքները կապված չեն հակամարտության հետ։
Դրանց թվում են կուտակումները, առաջարկի պակասը և գների չհիմնավորված բարձրացումը։ Նա հավելել է, որ շուկայի կարգավորման կառավարական շտաբը հատուկ ուշադրություն է դարձնում այս հարցերին։
Գերատեսչության խոսնակը հայտնել է, որ կառավարությունը վերանայում է սուբսիդիաների չափերը և ցանկանում է ավելացնել դրանք, որպեսզի նվազեցնի հասարակության վրա գործադրվող ճնշումը։
