«Ռուսաստանը սխալ է թույլ տվել Հայաստանի հետ. դա փաստ է»

Քաղաքագետ Գենադի Պոդլեսնին է մեկնաբանել Ռուսաստան հայկական Ջերմուկ հանքային ջրի ներմուծման կասեցման և նաև հայկական կոնյակների հետ կապված նմանատիպ միջադեպերի շուրջ ստեղծված իրավիճակը, գրում է mt-smi.mirtesen.ru–ն։

Փորձագետը կարծում է, որ այս իրադարձությունները պատահական չեն և ժամանակակից քաղաքական հարաբերությունների մաս են կազմում, որտեղ տնտեսական լծակներն օգտագործվում են գործընկերների վրա ազդելու համար։ Պոդլեսնիի խոսքով վերջին տարիներին Ռուսաստանի և Հայաստանի միջև ստեղծված ամբողջ իրավիճակը հստակ վկայում է հարաբերությունների փոխման բնույթը։ Նա հիշեցրել է, որ Փաշինյանը իշխանության գալուց հետո Հայաստանը տարել է Ռուսաստանի հետ աստիճանական խզման ճանապարհով։ Փորձագետը նշել է, որ հենց Փաշինյանն էր, որը 2018 թվականի հանրահավաքներում հավատարմության երդում տվեց Լեռնային Ղարաբաղին, ում, ի վերջո, «դավաճանեց» միաժամանակ կարողանալով համոզել հայ ժողովրդի զգալի մասին, որ մեղավորը Ռուսաստանն է։ Պոդլեսնիի խոսքով Հայաստանը, փաստացի, ի դեմս Ռուսաստանի կորցրել է իր դաշնակցին և տնտեսական գործընկերոջը։ Փաշինյանի թիմը արագորեն հեռացնում է երկիրը ոչ միայն Մոսկվայից, այլ նաև ԵԱՏՄ–ից ԵՄ–ին և ՆԱՏՕ-ին միանալու վերջնական նպատակով։

«Կարելի է անվերջ խոսել այն «խեղաթյուրված քաղաքականության» մասին, որը Փաշինյանը վարել և շարունակում է վարել։ Գլխավորն այն է, որ, ի վերջո, նա այն է, ինչ կա։ Ամփոփելով, Ռուսաստանը կորցրել է Հայաստանին որպես դաշնակից և տնտեսական գործընկեր», - ասել է Պոդլեսնին։ Քաղաքագետը հիշեցրել է, որ դեռևս 2013 թվականին, որպես ընդդիմադիր պատգամավոր, Փաշինյանը քվեարկել է ԵԱՏՄ-ին Հայաստանի անդամակցության դեմ հայտարարելով, որ դա սպառնում է երկրի ինքնիշխանությանը։ Այժմ, ըստ Պոդլեսնիի, Հայաստանի ղեկավարությունը ոչ պաշտոնապես ընդունում է անդամակցության տնտեսական օգուտները, բայց կարծում է, որ Արևմուտքի քաղաքական դիվիդենտները կգերազանցեն Ռուսաստանի հետ խզման հետևանքով առաջացած սոցիալ-տնտեսական կորուստները։ «Իմ կարծիքով, տեղի ունեցածի համար մեղավոր են նաև Ռուսաստանի համապատասխան կառույցները,  և առաջին հերթին «Ռոսսոտրուդնիչեստվոն», Արտաքին գործերի նախարարությունը և Ռուսաստանի կառավարության տնտեսական բլոկը։ Հայաստանից անորակ կամ կեղծ ապրանքների հայտնաբերմանն ի պատասխան արգելող միջոցառումների ներդրման արձագանքը չափազանց ուշացած է։ Եվ մեր «զուսպ» քաղաքականությունը Լեռնային Ղարաբաղի վերաբերյալ իրական իրավիճակը հայ բնակչությանը բացատրելու հարցում, շատ լուրջ սխալ է», - կարծիք է հայտնել փորձագետը։

«Հիմնականում մենք արդեն կորցրել ենք Հայաստանը որպես ԵԱՏՄ-ի և ՀԱՊԿ-ի անդամ։ Եվ սա անվիճելի փաստ է, քանի որ ներկայիս հայ քաղաքացիների մեծամասնությունը աջակցում է Փաշինյանի արևմտամետ կուրսին», - եզրափակել է Պոդլեսնին։

Նյութը հրապարակման պատրաստեց Կամո Խաչիկյանը

www.1or.am