Իրանը չինական լրտեսական արբանյակ է օգտագործել ամերիկյան բազաները թիրախավորելու համար․ FT

Իրանը գաղտնի կերպով ձեռք է բերել չինական լրտեսական արբանյակ, որը թույլ է տվել վերջին պատերազմի ժամանակ վերահսկել Մերձավոր Արևելքում տեղակայված ամերիկյան ռազմաբազաները, գրել է «Financial Times»-ը՝ հղում անելով Իրանի ռազմական արտահոսած փաստաթղթերին։

Մոնիթորինգը տեղի է ունեցել Սաուդյան Արաբիայում, Հորդանանում, Բահրեյնում, Իրաքում, Քուվեյթում, Ջիբութիում, Օմանում և Արաբական Միացյալ Էմիրություններում, այդ թվում՝ ԱՄՆ ռազմական բազաներում և որոշակի ենթակառուցվածքային օբյեկտներում։

«TEE-01B» անունով արբանյակը ձեռք է բերվել Իսլամական հեղափոխության պահապանների կորպուսի ավիատիեզերական ուժերի կողմից 2024 թվականի վերջին՝ Չինաստան տարածքից արձակվելուց հետո։

«Ակնհայտ է, որ այս արբանյակն օգտագործվում է ռազմական նպատակներով, քանի որ այն շահագործվում է Իսլամական հեղափոխության պահապանների կորպուսի տիեզերական ուժերի կողմից, այլ ոչ թե Իրանի քաղաքացիական տիեզերական ծրագրի կողմից», - «Financial Times»-ին ասել է Իրանի հարցերով փորձագետ Նիկոլ Գրաեւսկին։

Կոորդինատների ցանկերը՝ ժամանակային նշագրերով, արբանյակային պատկերները և ուղեծրային վերլուծությունը ցույց են տվել, որ իրանցի հրամանատարներն արբանյակն օգտագործել են ԱՄՆ հիմնական ռազմական օբյեկտները վերահսկելու համար: Լուսանկարներն արվել են մարտ ամսին՝ այդ օբյեկտների վրա անօդաչու թռչող սարքերի և հրթիռների հարվածներից առաջ և հետո։

«Իրանին իսկապես անհրաժեշտ են այս միջոցները, որոնք տրամադրվել են իր արտասահմանյան գործընկերների կողմից այս պատերազմի ընթացքում, քանի որ դրանք թույլ են տալիս Իսլամական հեղափոխության պահապանների կորպուսին նախապես նույնականացնել թիրախներն ու ստուգել իրենց հարվածների արդյունավետությունը», - բացատրել է Գրաեւսկին։