Սեմյոն Բաղդասարով. Եթե Հայաստանը «ներքաշվի» իրանական հակամարտության մեջ, դա խելագարություն կլինի

Մարտի 23-ին Ռուսաստանի հայերի միությունը Մոսկվայում հանդիպում է կազմակերպել քաղաքագետ և Մերձավոր Արևելքի և Կենտրոնական Ասիայի ուսումնասիրությունների կենտրոնի տնօրեն Սեմյոն Բաղդասարովի հետ: Քննարկման հիմնական թեման եղել է Իրանի շուրջ տեղի ունեցող իրադարձությունները, Հայաստանի և այլ պետությունների համար հնարավոր սպառնալիքները, ինչպես նաև կարգավորման հեռանկարները, գրում է sng.today–ը:

Քննարկումը բացելով Սեմյոն Բաղդասարովը վերլուծել է Իրանի ներքաղաքական իրավիճակը: Նրա խոսքով Իրանի ղեկավարության արագ տապալման արտաքին հույսերը չեն իրականացել: Արդյունքում, նշել է քաղաքագետը, Իսրայելը և Միացյալ Նահանգները հայտնվել են անբարենպաստ վիճակում: Խոսելով տարածաշրջանային անվտանգության մասին փորձագետը ուշադրություն է հրավիրել այսպես կոչված «Թրամփի միջանցքի» հետ կապված ծրագրերի վրա: Նա զգուշացրել է, որ ռազմական հակամարտության հետագա սրումը կարող է ծանր հետևանքներ ունենալ Հայաստանի համար: Բաղդասարովը շեշտել է, որ այդ նախագիծը Իրանի համար զայրույթի աղբյուր է, քանի որ Թեհրանը վճռականորեն պահանջում է ամերիկյան ռազմաբազաների դուրսբերում տարածաշրջանից։

Հասանելի տեղեկությունների համաձայն ԱՄՆ-ը փորձում է Հայաստանին ներքաշել հակամարտության մեջ, գոնե պասիվ դերում։ Սակայն, Հայաստանի համար, որը փոքր երկիր է, և որը չի կարող դիմակայել Իրանին, դա խելագարություն կլինի։

ՀՀ-ում չինական գիտության և մշակույթի կենտրոնի տնօրեն Իզաբելլա Մուրադյանը հավելել է, որ Իրանի շուրջ զարգացումները արդեն իսկ լուրջ բարդություններ են առաջացնում Հայաստանի և ամբողջ Անդրկովկասի համար։ Նա նշել է ԱՄՆ-ի կողմից հնարավոր ցամաքային գործողության մասին բազմիցս արված հայտարարությունները։ Եթե այդպիսի գործողություն տեղի ունենա, նշել է Մուրադյանը, ապա ռազմական գործողություններ կիրականացվեն  Խարգ կղզուց և նաև Իրանի հյուսիսից, այսինքն դա կլինի հայկական սահմանի մոտ։ Նա հիշեցրել է, որ ռազմական գործողություններ արդեն իսկ ընթանում են, ուստի նախկինում Բանդար Աբբասով կամ իրանական այլ նավահանգիստներով Հայաստան ժամանած բեռների մի մասը պարզապես անգործության է մատնված և երկիր չի հասնում։ «Ներկայումս գործում են միայն Վրաստանով անցնող ճանապարհը և Ադրբեջանի միջով անցնող ժամանակավոր ճանապարհը, որը կարող է փակվել։ Սա նշանակում է, որ Իրանում ռազմական գործողությունները մեզ համար ծայրահեղ վտանգ են ներկայացնում շրջափակման հնարավորության պատճառով։ Սննդամթերքի գները արդեն իսկ բարձրացել են Հայաստանում», - ասել է Մուրադյանը։

Նա նաև հավելել է, որ մարտական ​​գործողությունների երկարաձգումը, և հատկապես ցամաքային գործողության մեկնարկը, կարևորագույն նշանակություն կունենան Հայաստանի համար ոչ միայն տնտեսական, այլ նաև արտաքին քաղաքականության տեսանկյունից։ Նրա կարծիքով, Հայաստանի արևմտյան կողմնորոշմամբ ղեկավարությունն այժմ վնասում է ոչ միայն հանրապետության, այլ նաև Իրանի, Ռուսաստանի և Չինաստանի շահերին։ «Ամերիկացիները, ըստ էության, ցանկանում են Հայաստանից խլել Լիխտենշտեյնի չափ տարածք Սյունիքի մարզում։ Եթե այդ նախագիծը իրականություն դառնա, այնտեղ ամերիկյան բազան 315 անգամ ավելի մեծ կլինի, քան Շիրակի ռուսական բազան։ Ամերիկացիները անմիջապես հայտարարել են, որ TRIPP-ի կառավարումը կփոխանցեն միջազգային BlackRock ընկերությանը, որը փաստացի գործում է Ռուսաստանի դեմ Ուկրաինայում։ Ես կոչ եմ անում Ռուսաստանի իշխանություններին համագործակցել, քանի որ մենք մոտենում ենք անդարձելիության կետին», - հայտարարել է Մուրադյանը։

Նրա կարծիքով, ստեղծված իրավիճակը Հայաստանի համար կյանքի և մահվան հարց է, մինչդեռ Ռուսաստանի համար այն սպառնում է Կովկասում նոր սրացումով։ «Իրականում այս գործընթացները խորապես փոխկապակցված են։ Եվ նույնիսկ Ուկրաինայի հետ։ Թվում է, թե Ուկրաինան և Հայաստանը տարբեր բաներ են, բայց նրանք նույն շղթայի օղակներ են։ Եվ ես կարծում եմ, որ այսօր մենք պետք է քայլ անենք դեպի հայ հասարակությունը և փորձենք հարաբերություններ կառուցել Հայաստանի հետ», - եզրափակել է Իզաբելլա Մուրադյանը։

Նյութը հրապարակման պատրաստեց Կամո Խաչիկյանը

www.1or.am