Հինգ երկիր մերժել է ԱՄՆ-ի՝ Հորմուզի նեղուցի կոալիցիային միանալու կոչը
ՄԻՋԱԶԳԱՅԻՆ
Մեծ Բրիտանիան, Չինաստանը, Հարավային Կորեան, Ֆրանսիան և Ճապոնիան բացահայտ կամ անուղղակիորեն մերժել են ԱՄՆ վարչակազմի կոչը՝ թույլատրել նավթատար նավերի անցումը Հորմուզի նեղուցով, գրել է ՏԱՍՍ-ը։
Մասնավորապես, Չինաստանը և Ֆրանսիան ընդգծել են տարածաշրջանային վեճի դիվանագիտական լուծման անհրաժեշտությունը։ Մեծ Բրիտանիան ու Ճապոնիան միանշանակ մերժել են առաջարկը, մինչդեռ Հարավային Կորեան խոստացել է «քննարկել առաջարկն ու խորհրդակցություններ անցկացնել»։
Չինաստանի իշխանությունները հայտարարել են, որ անհրաժեշտ են համարում խուսափել այնպիսի գործողություններից, որոնք կարող են սրել ԱՄՆ-ի և Իրանի միջև հակամարտությունը։ Չինաստանի արտաքին գործերի նախարարության խոսնակ Լին Ծյանը ճեպազրույցի ժամանակ հայտարարել է, որ երկիրը կոչ է անում բոլոր կողմերին անհապաղ դադարեցնել ռազմական գործողությունները։ Ֆրանսիայի զինված ուժերի նախարար Կատրին Վոտրենը հայտարարել է, որ երկիրը նախընտրում է դիվանագիտական նախաձեռնությունները այս հարցում։
Ճապոնիայի վարչապետ Սանաե Տակաիչին և պաշտպանության նախարար Շինջիրո Կոիզումին հայտարարել են, որ Տոկիոն ներկայումս չունի Հորմուզի նեղուց ռազմանավեր ուղարկելու ծրագրեր։
Բրիտանական «The Telegraph» թերթը հաղորդել է, որ Մեծ Բրիտանիայի վարչապետ Քեյր Սթարմերը նույնպես հրաժարվել է ռազմանավեր ուղարկել տարածաշրջանում նավագնացությունը վերականգնելու համար։
KBS-ը, հղում անելով Հարավային Կորեայի նախագահի վարչակազմի պաշտոնյայի, հաղորդել է, որ երկիրը վերանայում է ԱՄՆ նախագահի առաջարկը։ Ավելի ուշ նախագահի մամուլի քարտուղար Լի Կյու Յոնգը հայտարարել է, որ հարցը պետք է լուծվի «Միացյալ Նահանգների և Կորեայի Հանրապետության միջև բավարար ժամանակահատվածում բավարար խորհրդակցություններից հետո»։ Վաշինգտոնն ու Սեուլը պահպանում են հաղորդակցությունը այս հարցի շուրջ։
Ավստրալիան նույնպես որոշել է արձագանքել Թրամփի կոչին, չնայած նման հարցումներ չի ստացել։ «Մենք մտադրություն չունենք նավեր ուղարկել Հորմուզի նեղուց», - ABC ռադիոկայանի եթերում հայտարարել է ենթակառուցվածքների և տրանսպորտի նախարար Քեթրին Քինգը։
Մարտի 14-ին ԱՄՆ նախագահ Դոնալդ Թրամփը «Truth Social»-ում գրել է, որ Հորմուզի նեղուցով նավթ ստացող երկրները պետք է ապահովեն առևտրային նավերի անցումը: Նա կոչ է արել Միացյալ Թագավորությանը, Չինաստանին, Կորեային, Ֆրանսիային ու Ճապոնիային, ի թիվս այլոց, ձեռնարկել այս քայլը:
