Շվեդիան իր նոր տարեկան հետախուզական զեկույցում Ռուսաստանին անվանել է «գլխավոր ռազմական սպառնալիք»
ՄԻՋԱԶԳԱՅԻՆ
Ռուսաստանը Շվեդիայի համար հիմնական ռազմական սպառնալիքն է ներկայացնում, և Մոսկվայի «աճող ռիսկային վարքագիծը» կարող է վտանգավոր սրացում առաջացնել, ասվում է Շվեդիայի ռազմական հետախուզության և անվտանգության ծառայության (MUST) տարեկան զեկույցում, որին հղում է կատարում Politico-ն։
Զեկույցում Շվեդիայի անմիջական հարևանությամբ, այդ թվում՝ Բալթիկ ծովում, Ռուսաստանի ագրեսիվ գործողությունների օրինակներ են նշվում օդային տարածքի խախտումները, դիվերսիաները և կիբերգործողությունները։
Փաստաթղթի հեղինակները ռուսական սպառնալիքը համարում են «լուրջ և կոնկրետ», իսկ Մոսկվայի վարքագիծը բնութագրում են որպես «օպորտունիստական և ագրեսիվ»։
Շվեդական զեկույցը հաջորդում է վերջերս հրապարակված էստոնական հետախուզական զեկույցին, որն այս տարի գրեթե ամբողջությամբ կենտրոնացած էր Ռուսաստանի վրա։ Էստոնական հետախուզությունը կարծում է, որ մոտ ապագայում Մոսկվայի կողմից ՆԱՏՕ-ի որևէ պետության վրա հարձակվելու սպառնալիքը բացառվում է, սակայն «Ռուսաստանը մնում է վտանգավոր երկիր՝ չնայած իր անգործունակությանը», և զգոնությունը անհրաժեշտ է «ռուսական աշխարհի» ընդլայնումը կանխելու համար»։ Էստոնական հետախուզության զեկույցում նաև նշվում է, որ Ռուսաստանը կտրուկ ավելացրել է հրետանային արկերի արտադրությունը՝ նշան, ինչպես հեղինակներն են նկարագրել, որ Մոսկվան կշարունակի սպառնալիք ներկայացնել, նույնիսկ եթե Ուկրաինայում խաղաղություն հաստատվի։
