«Կալաշնիկով. ԵԱՏՄ-ին անդամակցությունից Հայաստանն ավելի շատ բան է շահել, քան Ռուսաստանը»

Եվրասիական տնտեսական միությանը (ԵԱՏՄ) անդամակցությունից Հայաստանն ավելի շատ բան է շահել, քան Ռուսաստանը։ Այս մասին «Ռոսիա 24» հեռուստաալիքի եթերում հայտարարել է Պետդումայի ԱՊՀ հարցերով, եվրասիական ինտեգրման և հայրենակիցների հետ հարաբերությունների հանձնաժողովի նախագահ Լեոնիդ Կալաշնիկովը, գրում է vesti.ru–ն։

2025 թվականի հունվարին Հայաստանի կառավարությունը աջակցել էր արևմտամետ կուսակցությունների օրենսդրական նախաձեռնությանը՝ երկրի Եվրամիությանը անդամակցության գործընթացը սկսելու համար: Ավելի ուշ նախագահ Վահագն Խաչատուրյանը հաստատել էր այս գործընթացը նախաձեռնող օրենքը։ Ռուսաստանի փոխվարչապետ Ալեքսեյ Օվերչուկն այդ կապակցությամբ հայտարարել էր. «Ռուսաստանը այդ գործողությունները համարում է Հայաստանի առաջին քայլը ԵԱՏՄ-ից դուրս գալու ուղղությամբ, քանի որ ԵՄ անդամակցությունը և ԵԱՏՄ-ին մասնակցությունը անհամատեղելի են»։ «Երբ ես լսում եմ ձայներ Հայաստանից, որոնք ասում են, որ պատրաստ են ամեն ինչ թողնել և շտապել Եվրոպա, ես միշտ ասում եմ իմ հայ ընկերներին. նայեք, թե ո՞վ է ավելի շահել Եվրասիական տնտեսական միությանը մասնակցելուց։ Ռուսաստանը շատ ավելի քիչ օգուտ է ստացել, բայց, օրինակ, Հայաստանի համար բացվել է հսկայական ռուսական շուկան՝ իրենց արտադրանքի, իրենց ծառայությունների համար։ Դուք ուզո՞ւմ եք այդ ամենը փակել։ Եթե այո, ապա ասեք ձեր քաղաքացիներին, որ փակում եք այն։ Եվ հետո գնացեք բանակցեք Եվրամիության հետ այն մասին, բայց արդյո՞ք նրանք կարիք ունեն ձեր մրգերի և բանջարեղենի։ Նրանք դրա համար ուղղակի պատասխան չունեն», - ասել է Կալաշնիկովը։

Նյութը հրապարակման պատրաստեց Կամո Խաչիկյանը

www.1or.am