Մայրը դիմել է ոստիկանություն և հայտնել, որ 10-ամյա որդու համադասարանցին, նախապես քարը ձնագնդիկի մեջ տեղադրելով, հարվածել է որդուն և պատճառել մարմնական վնասվածք

SHAMSHYAN.com-ի տեղեկություններով` հունվարի 16-ին արտառոց դեպք է տեղի ունեցել Լոռու մարզում։ Ժամը 17։20-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության Տաշիրի բաժին է դիմել Լոռու մարզի բնակիչ 35-ամյա Սուսաննա Շ․-ն և հայտնել, որ դպրոցից տուն վերադառնալիս, որդուն քարով հարվածել են։

Ինչպես հայտնում է ֆոտոլրագրող Գագիկ Շամշյանը, կինը ոստիկաններին հայտնել է, որ Տաշիր քաղաքի Սայաթ-Նովա փողոցում իր որդու համադասարանցի՝ 9-ամյա Զ․ Մ․-ն, նախապես քարը ձնագնդիկի մեջ տեղադրելով, հարվածել է որդու՝ 10-ամյա Ռ․ Ա․-ի ճակատի շրջանին՝ պատճառելով մարմնական վնասվածք։

Դեպքի փաստով ոստիկանության Տաշիրի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Լոռու մարզային քննչական վարչության Ստեփանավանի քննչական բաժին։