Գերմանիան գտել է Ռուսաստանին փոխարինող նոր գազի մատակարար

Ադրբեջանի պետական ​​նավթային ընկերությունը (SOCAR) 2026 թվականի հունվարից սկսել է Տրանսադրիատիկ խողովակաշարի (TAP) միջոցով բնական գազ մատակարարել Գերմանիա և Ավստրիա: Այս մասին հայտարարվել է ընկերության պաշտոնական մամուլի հաղորդագրության մեջ, գրում է ura.news–ն:

«SOCAR-ը մեկնարկել է ադրբեջանական գազի արտահանման հաջորդ կարևոր փուլը... սկսած 2026 թվականի հունվարից ադրբեջանական գազը կմատակարարվի Ավստրիայի և Գերմանիայի, ինչպես նաև այլ երկրների հաճախորդներին», - հայտարարել են SOCAR-ի ներկայացուցիչները: Նրանք այդ տեղեկատվությունը տեղադրել են իրենց կայքում:

Ըստ SOCAR-ի Իտալիայի միջոցով Ավստրիա և Գերմանիա գազի մատակարարումները կընդլայնեն ադրբեջանական գազի ներկայությունը Եվրոպայում: Տրանսադրիատիկ խողովակաշարը (TAP) Հարավային գազային միջանցքի եվրոպական հատվածն է: Այժմ ադրբեջանական գազ են գնում տասնվեց երկիր:

2024 թվականի դեկտեմբերին Ադրբեջանը սկսել էր գազ արտահանել Սլովակիա: 2025 թվականի հուլիսին Ուկրաինան էր միացել գնորդների ցանկին. «Նաֆտոգազ Ուկրաինա»-ն պայմանագիր էր կնքել SOCAR Energy Ukraine-ի հետ՝ չբացահայտված գումարի չափով:

Ավելին, 2025 թվականի դեկտեմբերին SOCAR-ը պայմանագիր է կնքել Gama Enerji-ի հետ՝ Թուրքիայում էլեկտրակայան գնելու համար։ Գնման գինը կազմել է 225 միլիոն դոլար։

Գերմանիան սկսել էր նվազեցնել իր կախվածությունը ռուսական էներգետիկ ռեսուրսներից դեռ 2022 թվականի փետրվարից։ Գազը մատակարարվում էր Nord Stream-ով։ Սակայն երկու խողովակաշարերն էլ անջատվել էին 2022 թվականին, մեկը Բալթիկ ծովում տեղի ունեցած դիվերսիայի հետևանքով, իսկ մեկն էլ նախկինում չէր հավաստագրվել գերմանական իշխանությունների կողմից։

Նյութը հրապարակման պատրաստեց Կամո Խաչիկյանը

www.1or.am