Հայտնում եմ Իսրայելի կառավարության աջակցությունն ԱՄՆ-ի վճռական գործողություններին. Նեթանյահու
Վենեսուելայի վերաբերյալ ես ուզում եմ հայտնել Իսրայելի կառավարության աջակցությունը Միացյալ Նահանգների վճռական գործողություններին՝ այս տարածաշրջանում ազատությունն ու արդարությունը վերականգնելու համար։ Այս մասին հայտարարել է Իսրայելի վարչապետ Բենիամին Նեթանյահուն հրեական պետության կաբինետի շաբաթական նիստին՝ ТАСС-ի փոխանցմամբ:
«Պետք է ասեմ, որ Լատինական Ամերիկայում այժմ հեղափոխություն է ընթանում։ Մի շարք երկրներ վերադառնում են ամերիկյան առանցքին և, ինչպես և սպասվում էր, Իսրայելի հետ կապերին։ Մենք ողջունում ենք սա, ողջունում ենք նախագահ Թրամփի որոշումը և ողջունում ենք ամերիկյան զինվորականներին, որոնք անթերի գործողություն իրականացրին», - ասել է Նեթանյահուն։
Հիշեցնենք, որ հունվարի 3-ին Վենեսուելայի ԱԳ նախարար Իվան Գիլ Պինտոն հայտարարել է, որ Միացյալ Նահանգները հարձակվել է Կարակասում քաղաքացիական և ռազմական թիրախների վրա: Նա Վաշինգտոնի գործողությունները որակել է որպես ռազմական ագրեսիա: Վենեսուելայում հայտարարվել է արտակարգ դրություն: Թրամփը հաստատել է Վենեսուելայի դեմ հարվածները: Երկրի նախագահ Նիկոլաս Մադուրոն և նրա կինը գերի են վերցվել և դուրս են բերվել երկրից: ԱՄՆ նախագահը նաև հայտարարել է, որ Միացյալ Նահանգները մտադիր է ժամանակավորապես վերահսկողություն հաստատել Վենեսուելայի նկատմամբ:
