Ռուսաստանն ու Իսրայելը քննարկում են Երուսաղեմի Հին քաղաքի Ալեքսանդրյան մենաստանի պաշտոնական փոխանցումը ՌԴ-ին

Ռուսաստանն ու Իսրայելը շփումներ են անցկացնում Երուսաղեմում Ալեքսանդրյան մենաստանը ՌԴ-ին փոխանցելու վերաբերյալ։ Այդ մասին ՏԱՍՍ-ին հայտնել է աղբյուրը։

«Փոխանցման շանսեր, անխոս, կան, շփումները շարունակվում են։ Իսրայելը կարող է գնալ այդ քայլին քաղաքական բարենպաստ պահի», - նշել է գործակալության զրուցակիցը։

Ալեքսանդրյան մենաստանը գտնվում է Երուսաղեմի Հին քաղաքում՝ Տիրոջ գերեզմանի տաճարից ոչ հեռու։ Դրա կառուցման համար հողատարածքը 1859 թվականին ձեռք է բերել Ալեքսանդր II-ը, իսկ շենքերի համալիրը 1896 թվականին կառուցել է Կայսերական ուղղափառ պաղեստինյան ընկերությունը։

Մենաստանի նկատմամբ սեփականության իրավունքի շուրջ վեճերը սկսվել են 1917 թվականի հեղափոխությունից հետո։

2022 թվականի ապրիլին ՌԴ նախագահ Վլադիմիր Պուտինը գրավոր դիմել էր այդ ժամանակ Իսրայելի վարչապետի պաշտոնը զբաղեցնող Նաֆթալի Բենեթին՝ խնդրելով դրական որոշում կայացնել Ալեքսանդրյան մենաստանի նկատմամբ Ռուսաստանի սեփականության իրավունքի գրանցման հարցում։

Երուսաղեմի շրջանային դատարանը վճռել էր, որ նման հարցը պետք է լուծի բացառապես երկրի կառավարությունը, այլ ոչ թե դատական ատյանը։