Պայթյուն Մեքսիկայում՝ ոստիկանության բաժանմունքի մոտ․ զոհվել է առնվազն 3 մարդ, 6-ը վիրավորվել են
ՄԻՋԱԶԳԱՅԻՆ
Մեքսիկայի արևմտյան Միչոական նահանգում ոստիկանության բաժանմունքի մոտ տեղի ունեցած պայթյունի հետևանքով շաբաթ օրը զոհվել է առնվազն երեք մարդ, ևս վեցը վիրավորվել են, հայտնում է NBC News-ը։
Պայթյունը տեղի է ունեցել այն բանից հետո, երբ դաշնային կառավարությունը նահանգում ուժեղացրել էր անվտանգության միջոցառումները՝ աղմկահարույց վերջին երկու սպանություններից հետո լրացուցիչ զորքեր ուղարկելով։ Գլխավոր դատախազության հայտարարության մեջ նշվում է, որ Կոաուայանի կենտրոնական պողոտայում ավտոմեքենա է պայթել։
«Վարորդը տեղում զոհվել է, ևս երկու մարդ մահացել է մարզային հիվանդանոցում, ևս վեցը վիրավորվել են», – ասվում է հաղորդագրությունում։
Ըստ տեղական ոստիկանության հրամանատար Էկտոր Զեպեդայի, հիվանդանոցում մահացած երկու անձինք եղել են տեղի ոստիկանության աշխատակիցներ։ Ըստ նրա, որոշ զոհերի մասունքներ հայտնաբերվել են պայթյունի տարածքում, որը նաև վնասել է հարակից շենքերը։
«Այս գործողության շրջանակում [դաշնային կառավարությունից] շատ ծովային հետևակայիններ են ժամանել, – ասել է Զեպեդան։ – Մենք դադարեցրել ենք պարեկությունը, քանի որ գործողությունը շարունակվում է»։ Տեղական ոստիկանությունը, որը պարեկում է տարբեր գյուղական համայնքներ, մնացորդն է քաղաքացիական ինքնապաշտպանական ուժերի, որոնք ավելի քան տասը տարի առաջ զենք էին վերցրել՝ համայնքները նարկոկարտելներից պաշտպանելու համար, իսկ հետո պաշտոնապես հաստատվել էին պետության կողմից։
Կոաուայանան գտնվում է խաղաղօվկիանոսյան ափին մոտ՝ արևմտյան Միչոականում, Կոլիմա նահանգի սահմանին, որտեղ տեղակայված է հզոր «Խալիսկո նոր սերունդ» կարտելը։
