Հնդկաստանում անտառապահներն անօդաչուներ են կիրառել մարդակեր գայլերին հետևելու համար․ զոհվել է 9 մարդ
ՄԻՋԱԶԳԱՅԻՆ
Հնդկաստանում անտառապահները անօդաչու թռչող սարքեր են կիրառել՝ մարդակեր գայլերին հետևելու համար, այն բանից հետո, երբ վերջին շաբաթների ընթացքում կենդանիները սպանել են առնվազն ինը մարդու, հիմնականում երեխաների, հայտնում է AFP-ն։
Պաշտոնյաների տվյալներով, վերջին զոհը դարձել է 10 ամսական մի աղջիկ, որին շաբաթ օրը գայլը հափշտակել է Ուտար Պրադեշ նահանգի հյուսիսում գտնվող Բահրայխ շրջանում, երբ նա քնած էր մոր կողքին։ Ավելի ուշ երեխայի դին հայտնաբերվել է դաշտում։
Օրեր առաջ մոր աչքի առաջ գայլը հափշտակել էր հինգ տարեկան տղայի, որը դուրս էր եկել տնից։ Երեխան, որին գտել էին խեղված վիճակում շաքարեղեգի դաշտում, մահացել էր հիվանդանոց տեղափոխվելու ճանապարհին։ Պաշտոնյաները նշել են, որ հարձակումը տեղի է ունեցել նույն սխեմայով, ինչ մյուս գյուղերում, որտեղ սեպտեմբերից հաղորդվել էր նմանատիպ դեպքերի մասին։
Ոստիկանության, անտառտնտեսությունների և լրատվամիջոցների տվյալներով, Բահրայխում գայլերի ենթադրյալ հարձակումների զոհերի թիվը երեք ամսում հասել է առնվազն իննի։ Զոհերի թվում եղել է նաև տարեց զույգ։ Անտառային ծառայության աշխատակից Ռամ Սինգհ Յադավը AFP-ին հայտնել է, որ իշխանությունները տարածքում տեղակայել են անօդաչուներ, ֆոտոկալանիչներ և զինված պահակներ։
Անտառտնտեսության այլ ներկայացուցիչներ նշել են, որ կենդանիները անսովոր համարձակ են եղել։
Անցած տարի Բահրայխում տեղի էր ունեցել նմանատիպ հարձակումների ալիք, երբ գայլերի մի խումբ սպանել էր առնվազն ինը մարդու և վիրավորել ևս մի քանիսին։ Բահրայխի արոտավայրերը գտնվում են մոտ 50 կիլոմետր հարավ՝ Նեպալի սահմանից, որտեղ Հիմալայների նախալեռները ծածկված են խիտ անտառներով։
Փորձագետները նշում են, որ գայլերը մարդկանց կամ տնային կենդանիների վրա հարձակվում են միայն ծայրահեղ դեպքում, երբ սոված են, նախընտրելով ավելի անվտանգ որս, օրինակ՝ փոքր անտիլոպներ։
Հնդկաստանում մոտ 3000 գայլեր ապրում են հիմնականում պահպանվող տարածքներից դուրս՝ հաճախ մարդկանց անմիջական հարևանությամբ։ Այս կենդանիները, որոնք հայտնի են նաև որպես «հարթավայրային գայլեր» և ընդգրկված են խոցելի տեսակների ցանկում, չափերով փոքր են, քան ավելի ուժեղ հիմալայան գայլերը, և հաճախ կարելի է շփոթել այլ տեսակների՝ օրինակ՝ շակալների հետ։
