Մեքենաներ են բախվել բենզալցակայանի երկաթե արգելապատնեշին

Այսօր՝ նոյեմբերի 29-ին, ավտովթար է տեղի ունեցել Երևանում։ Ժամը 18։50-ի սահմաններում Ազատության պողոտա և Բաբայան փողոցի խաչմերուկում բախվել են Երևանի բնակիչներ 22-ամյա Սամվել Զ․-ի վարած «Ford Fusion» մակնիշի և 39-ամյա Աննա Մ․-ի վարած «Nissan X-Trail» մակնիշի ավտոմեքենաները, ինչի հետևանքով վերջինը գլխիվայր շրջվել է, իսկ «Ford Fusion»-ը բախվել է բազալտե եզրաքարերին և բենզալցակայանի երկաթե արգելապատնեշին։

Ինչպես հայտնում է ֆոտոլրագրող Գագիկ Շամշյանը, վթարի հետևանքով, ըստ նախնական տեղեկությունների, բարեբախտաբար տուժածներ չկան։

Դեպքի վայր են ժամանել ՀՀ Ներքին գործերի նախարարության ոստիկանության Պարեկային ծառայության Երևան քաղաքի գնդի 2-րդ գումարտակի 3-րդ վաշտի պարեկները՝ գումարտակի հրամանատար Լևոն Բադալյանի, գումարտակի հրամանատարի տեղակալ Կարեն Ավետիսյանի և վաշտի հրամանատար Վահագն Խառատյանի գլխավորությամբ։

Տարածքը սահմանազատել են նույն վաշտի պարեկներ Կարաննի Հարոյանը և Դավիթ Վարոսյանը։

Վթարի փաստով ՊԾ Երևան քաղաքի գնդի 2-րդ գումարտակում փաստաթղթեր են ձևակերպվում։