Իրանը հետ է կանչել Մեծ Բրիտանիայում, Ֆրանսիայում և Գերմանիայում իր դեսպաններին, մերժել է ԱՄՆ-ին

Իրանը հետ է կանչել Մեծ Բրիտանիայում, Ֆրանսիայում և Գերմանիայում իր դեսպաններին՝ պատժամիջոցների վերականգնման պատճառով։

Իրանական պետական ​​հեռուստատեսությունն այս քայլի պատճառ է նշել «երեք եվրոպական երկրների անպատասխանատու վարքագիծը, որոնք փորձում են վերականգնել ՄԱԿ-ի Անվտանգության խորհրդի չեղյալ հայտարարված բանաձևերը»։

Մեկ օր առաջ ՄԱԿ-ի Անվտանգության խորհրդի 15 անդամ պետությունների մեծամասնությունը դեմ է քվեարկել Իրանի դաշնակիցների՝ Չինաստանի և Ռուսաստանի կողմից մշակված բանաձևին, որը Թեհրանին ավելի շատ ժամանակ կտար բանակցությունների համար և կհետաձգեր պատժամիջոցների վերականգնումը ևս վեց ամսով՝ մինչև 2026 թվականի ապրիլի 18-ը։

Օգոստոսի վերջին «Եվրաեռյակը», որը բաղկացած է Մեծ Բրիտանիայից, Գերմանիայից և Ֆրանսիայից, գործարկել էր մեխանիզմ՝ Թեհրանի դեմ ՄԱԿ-ի պատժամիջոցները, որոնք կասեցվել էին վերջին տասնամյակում, 30 օրվա ընթացքում վերականգնելու համար։ Այս «հետադարձ մեխանիզմի» ժամկետը լրանում է սեպտեմբերի 28-ի կիրակի գիշերը։

Բացի այդ, Իրանը մերժել է ԱՄՆ-ի պահանջը՝ հանձնել իր ամբողջ հարստացված ուրանը երեքամսյա պատժամիջոցների մեղմացման դիմաց։

«Սա բացարձակապես անընդունելի է», - Նյու Յորքում լրագրողներին ասել է Իրանի նախագահ Մասուդ Փեզեշկիանը։