Ռուսաստանը վերականգնում է բարտերային առևտուրը՝ արևմտյան պատժամիջոցները շրջանցելու համար. Reuters

Ռուսաստանի արտաքին առևտրում 1990-ականներից ի վեր առաջին անգամ աճում է հնաձև բարտերային փոխանակումը, քանի որ ընկերությունները, որոնք ձգտում են շրջանցել Արևմուտքի պատժամիջոցները, ցորենը փոխարինում են չինական մեքենաներով, իսկ կտավատի սերմերը՝ շինանյութերով, գրել է Reuters-ը։ 

Բարտերի նկատմամբ աճող հետաքրքրությունը պայմանավորված է մի շարք ռուսական բանկերի SWIFT համակարգից անջատմամբ, երկրորդային պատժամիջոցների ռիսկով և չինական բանկերի կողմից դոլարով և եվրոյով հաշվարկներ կատարելու դժկամությամբ։

2024 թվականին Ռուսաստանի տնտեսական զարգացման նախարարությունը թողարկել է հատուկ ուղեցույց բիզնեսների համար՝ արտաքին առևտրի բարտերային գործարքներ իրականացնելու վերաբերյալ։

Reuters-ը բացահայտել է առնվազն ութ նման գործարք, այդ թվում՝ մետաղների փոխանակում մեքենաների հետ և գործարքներ Չինաստանի և Պակիստանի հետ։ Մասնագետների կարծիքով՝ բարտերային առևտրի ծավալները կաճեն, չնայած մաքսային ծառայությունը նշել է, որ դրանց բաժինը դեռևս աննշան է արտաքին առևտրի ընդհանուր շրջանառության համեմատ։