Քննարկվել են Հայաստանում և Իրանում պատիժ կրող դատապարտյալների փոխանցման մեխանիզմները

Արդարադատության նախարարությունից հայտնում են՝ նախարարի տեղակալ Աննա Կարապետյանն ընդունել է Իրանի Իսլամական Հանրապետության արտաքին գործերի նախարարի տեղակալ Վահիդ Ջալալզադեին։

Կողմերը բարձր են գնահատել երկու պետությունների միջև առկա արդյունավետ համագործակցությունը, այդ թվում՝ արդարադատության նախարարությունների գործունեության ոլորտներում։

Քննարկվել են Հայաստանում պատիժը կրող և Իրանի քաղաքացի հանդիսացող դատապարտյալների փոխանցման, Իրանի կողմից հետախուզվող անձանց հանձնման, Իրանում պատիժ կրող Հայաստանի քաղաքացիների փոխանցման հետ կապված հարցեր:

Նախարարի տեղակալ Աննա Կարապետյանը կարևորել է ՀՀ-ԻԻՀ դատական և իրավական հարցերով համատեղ հանձնաժողովի գործունեությունը՝ շեշտելով նաև արդեն իսկ առկա իրավապայմանագրային բազայի արդյունավետ կիրառության մասին: Նա նաև ընդգծել է առաջիկայում ՀՀ արդարադատության նախարարի հրավերով ԻԻՀ արդարադատության նախարարի՝ Հայաստան այցի կարևորությունը՝ նշելով, որ այն ևս մեկ առիթ է ամրապնդելու համագործակցությունը և ընդլայնելու պայմանագրային հարաբերությունները: Կարևորվել է նաև առաջիկայում համատեղ հանձնաժողովի հերթական նիստի անցկացումը:

Հանդիպման ավարտին կողմերը վերահաստատել են արդյունավետ համագործակցությունը շարունակելու իրենց պատրաստակամությունը: