Մակունցին արագ պաշտոն տվեցին

ՀՀ վարչապետի աշխատակազմից տեղեկացնում են, որ Նիկոլ Փաշինյանի որոշմամբ Լիլիթ Մակունցը նշանակվել է վարչապետի գլխավոր խորհրդական։ Մակունցը օրերս հետ կանչվեց ԱՄՆ-ում ՀՀ դեսպանի պաշտոնից։ Մինչ այդ մենք հայտնել էինք, որ Փաշինյանը ցանկանում է Մակունցին իր խորհրդական նշանակել։

Մակունցը 2021 թվականի օգոստոսի 2-ին նշանակվել էր ԱՄՆ-ում ՀՀ արտակարգ և լիազոր դեսպան։ Պաշտոնավարման ավարտից հետո Լիլիթ Մակունցը ՀՀ նախագահի հրամանագրով օգոստոսի 27-ին հետ է կանչվել ԱՄՆ-ում ՀՀ դեսպանի պաշտոնից։ Լիլիթ Մակունցը Փաշինյանի իշխանության օրոք Ազգային ժողովում եղել է կառավարող խմբակցության ղեկավար, այնուհետև դարձել Մշակույթի նախարար։ Մասնագիտական որևէ հմտություն չունեցող տիկինը բարձր պաշտոնների նշանակվել էր միայն մեկ պատճառով՝ Նիկոլ Փաշինյանի անգլերենի ուսուցիչն է եղել։ Հաշվի առնելով, թե որքան վատ է Փաշինյանը անգլերեն խոսում, կարելի է գնահատել նաև ուսուցման ոլորտում Մակունցի փորձը։

Ի դեպ, գլխավոր խորհրդականի պաշտոնը վերջինը չի լինելու Լիլիթ Մակունցի գլխապտույտ կարիերայում։ Մեր տեղեկություններով, Փաշինյանը շատ է ցանկանում վերջինիս դարձնել Ազգային ժողովի նախագահ։ Իսկ նման հնարավորություն կլինի, եթե Փաշինյանին ու իր թիմին հաջողվի կրկին զավթել իշխանությունը 2026 թ. խորհրդարանական ընտրություններում։

Ալլա Աբգարյան