Թրամփը հրամայել է սև ներկել Մեքսիկայի հետ սահմանային պատը. հայտնի է՝ ինչու

ԱՄՆ-Մեքսիկա սահմանին կառուցվող պատը ներկվելու է սև, որպեսզի այն տաքանա արևի տակ և այդպիսով կանխվի անօրինական ներգաղթյալների կողմից դրա վրայով բարձրանալը, հայտարարել է ԱՄՆ ներքին անվտանգության նախարար Քրիստի Նոեմը։

Նոեմը այցելել է Նյու Մեքսիկո` ծանոթանալով պատի մի հատվածի կառուցման աշխատանքներին։ CBS-ի հաղորդմամբ՝ նա իր հետ բերել էր գլան՝ պատը ներկելու համար։ Սահմանապահ պարեկության պետ Մայք Բենքսը, որը գտնվում էր տեղում, ասել է, որ ներկը կօգնի նաև կանխել ժանգի առաջացումը։

«Սա արվել է հատուկ նախագահի խնդրանքով։ Նա հասկանում է, որ շոգ պայմաններում սև ներկվածը տաքանում է, և մարդկանց համար ավելի դժվար կլինի բարձրանալ (պատի վրա)։ Հետևաբար, մենք պատրաստվում ենք հարավային սահմանի ամբողջ պատը սև ներկել», - ասել է Քրիստի Նոեմը։

Իմիգրացիոն քաղաքականության խստացումը Դոնալդ Թրամփի հիմնական նախընտրական խոստումներից մեկն էր։ 2025 թվականի հունվարին երկրորդ անգամ պաշտոնը ստանձնելուց հետո նա ստորագրեց գործադիր հրամանագրեր՝ Մեքսիկայի սահմանին արտակարգ դրություն հայտարարելու և պատ կառուցելու մասին։ Թրամփը նաև ցանկանում էր արգելել մի քանի երկրների քաղաքացիների մուտքը Միացյալ Նահանգներ։