Դավիթբեկյան խաղեր 2025-ը եզրափակվեց Սյունիքում՝ 18 թիմի մասնակցությամբ
ՖՈՏՈ
«Դավիթբեկյան խաղեր 2025»-ն արդեն իրականություն է։ Հայաստանի դարպաս Սյունիքում 180 մասնակից պայքարեցին հաղթանակի համար, հաղթեց՝ «ՈՄԱ Կապան» թիմը։
«Թիմերը ոչ թե մրցում էին, այլև Կապանում դավիթբեկաբար մի նոր պատմություն էին գրում։ Հիշարժան պահերը շատ են, սակայն ամենակարևորը պատանիների միջև ուժեղ ընկերական կապերի ստեղծումն է, որը հետագայում իրենց միայն օգնելու է։ Միակ առաջարկս է, որ խաղերն ավելի երկար տևեն»,– ասաց հաղթող թիմի մարզիչ Ալեն Պողոսյանը։
Ուժեղանալ, պայքարել մինչև վերջ և երբեք չվհատվել։ Սրանք 14-ամյա Սերգեյ Թումանյանի ամենամեծ դասերն են, որոնք նա տանում է իր հետ «Դավիթբեկյան խաղեր 2025»-ից։ Սերգեյը Տավուշի մարզի Իջևան քաղաքից է և այս տարի մրցեց «ՈՄԱ Աչաջուր» թիմի կազմում։
«Այս մեկ շաբաթում ոչ միայն մասնակցեցի խաղերին, այլև ծանոթացա Սյունիքին, քանի որ նաև ճանաչողական այցեր էին ունենում։ Իրականում հասկացա, որ մենք մինչև վերջ չենք ճանաչում մեր հայրենիքը։ Ես Տավուշից եմ ու չէի պատկերացնում, որ հարավային հատվածը՝ Սյունիքը, այսքան գեղեցիկ է։ Բնությունը նման է մեր կողմերին, բայց այստեղ ժայռերը շատ ավելի տպավորիչ են։ Այստեղ է նաև Նժդեհի Խուստուփը», – պատմեց Սերգեյը։
Թեև նրա թիմը եզրափակիչ փուլ չհասավ, պատանին չի վհատվում։ Ասում է՝ մտադիր է շարունակել մարզվել, վերադառնալ ու նորից պայքարել, այս անգամ՝ հաղթելու վճռականությամբ։
«Սերգեյը խաղերից հենց այն է տանում, ինչն այս շարժման էությունը պետք է լինի՝ ներշնչվել, ամրանալ, զարգանալ և երբեք չհանձնվել», – ասաց ծրագրի ղեկավար Ալինա Գևորգյանը։
Ալինան նկատեց, որ 2022 թվականին խաղերն իրենց ճանապարհը սկսել են 8 թիմով, 2025-ին արդեն 18 թիմ մրցեց, ինչը նա նոր ձեռքբերում է համարում համահայկական փառատոն դառնալու ճանապարհին։
«Ուրախ ենք տեսնել, որ խաղերին նախկինում մասնակցած թիմերի կազմը փոխվում է, ինչն ապացույց է, որ դավիթբեկյան համայնքը մեծանում է։ 180 մասնակից ենք ունեցել, ու իսկապես ուժեղ թիմեր կային, և մրցավարների գործը բավականին բարդ էր։ Այս տարի ունենք թիմ նաև Սփյուռքից, և հույս ունենք, որ ամեն տարի Սփյուռքի ներգրավվածությունը կավելանա»,– շարունակեց Ալինա Գևորգյանը։
Մոսկվայից ժամանած թիմն իր մասնակցությամբ նոր էջ բացեց «Դավիթբեկյան խաղեր»-ի պատմության մեջ։
«Կարևոր է, որ միասնական լինենք, ընտանիքի պես։ Եթե այսպես լինենք, ապա բոլոր փորձությունները հաղթահարելի կլինեն։ Մեր թիմի մասնակիցների համար այս փորձությունները՝ անտառում արգելագոտիներ, պարանի ձգում թիրախային կրակ և այլն նոր մարտահրավեր էր, բայց առաջին անգամի համար գոհ եմ, մյուս տարի կփորձենք 3 թիմով ներկայանալ»,– ասաց թիմի մարզիչ Աշոտ Թևոսյանը։
Ոչ միայն խոսել, այլև գործել հանուն հայրենիքի, ինչն անում են հենց Դավիթբեկյան խաղերում։ Խաղերին աջակցող «Ամրոց» հիմնադրամի հոգաբարձուների խորհրդի նախագահ Տիգրան Բունաթյանի կարծիքն է։
«Մեր գերնպատակը ոչ միայն մրցույթում առաջին տեղ գրավելն է, այլ միասնական հաղթանակն ու ամուր պետականություն ունենալը։ Ամեն անգամ, երբ Մոսկվայից ժամանած մեր թիմը պառկում էր, մարզիչներն ասում էին՝ հիշեք՝ դուք տանն եք։ Այստեղ չկա կապանցի, գյումրեցի, դուք բռունցք եք՝ համախմբված և հզոր»,– նշեց Տիգրան Բունաթյանը։
«Դավիթբեկյան խաղեր 2025»-ին մասնակցեցին Հայաստանի տարբեր մարզերի 14–17 տարեկան պատանիները։ Պատանիներն ու աղջիկները մրցում են սպորտային, ռազմամարզական և մշակութային ոլորտներում։ Այս անգամ 15 մրցույթ է եղել՝ շախմատից մինչև Խուստուփի գագաթի հաղթահարում։ Խաղերի հիմքում հաղթանակն է՝ կրթության, գիտության, տնտեսության, սպորտի և բոլոր հնարավոր ոլորտներում։
