Անգլիայի տներից մեկում բռնել են կես մետրից ավելի երկարությամբ առնետ

Անգլիայի հյուսիսում գտնվող տներից մեկում բռնվել է կես մետրից ավելի երկարությամբ առնետ, որը համարվում է Մեծ Բրիտանիայում ամենամեծը, հաղորդում է Telegraph թերթը՝ հղում անելով տեղական իշխանություններին։

Կրծողը հայտնաբերվել է Նորմանբիում, Հյուսիսային Յորքշիր, վնասատուների դեմ պայքարի մասնագետի կողմից: Առնետի երկարությունը դնչից մինչև պոչը 22 դյույմ էր (55.88 սանտիմետր):

Ընդդիմադիր պահպանողականները կրծողների խնդրի համար մեղադրում են Լեյբորիստական կուսակցության կողմից ղեկավարվող խորհրդին, քանի որ տեղական իշխանությունները այլևս չեն զբաղվում առնետների ներխուժման խնդրով և ակնկալում են, որ բնակիչներն իրենք կվճարեն դրա դեմ պայքարի համար։

Մասնագետները գնահատում են, որ Մեծ Բրիտանիայում կարող է լինել մոտ 250 միլիոն առնետ, որոնք կարող են մարդկանց փոխանցվող հիվանդություններ կրել, այդ թվում՝ լեպտոսպիրոզ, որը սկզբում առաջացնում է գրիպանման ախտանիշներ, բայց կարող է հանգեցնել դեղնախտի և երիկամային անբավարարության։