Ինչի՞ կհանգեցնի Հայաստանում իշխանությունների և եկեղեցու միջև պառակտումը
ՔԱՂԱՔԱԿԱՆՈՒԹՅՈՒՆ
Վարչապետ Նիկոլ Փաշինյանի և նրա շրջապատի կողմից ներկայացված Հայաստանի իշխանությունների հակաեկեղեցական շարժումը կհանգեցնի Հայ Առաքելական Եկեղեցու (ՀԱԵ) ամրապնդմանը և ամբողջ աշխարհում, այդ թվում Ղրիմում, հայկական սփյուռքի միավորմանը։ Նման կարծիք է «Սպուտնիկը Ղրիմում» ռադիոկայանի եթերում հայտնել ՀԱԵ ներկայացուցիչ, Սիմֆերոպոլի Սուրբ Հակոբ եկեղեցու քահանա Ներսես Խանանյանը, գրում է crimea.ria.ru–ն։
Խանանյանի խոսքով հանրապետության վարչապետ Նիկոլ Փաշինյանի կողմից ՀԱԵ-ի հասցեին վիրավորանքներից հետո Հայաստանում իշխանությունների և եկեղեցու միջև աճող պառակտումը դժվար թե կարելի է հակամարտություն անվանել։
«Ավելի շուտ, սա հակաեկեղեցական շարժում է, որը անհանգստացնում է ոչ միայն հայերին Հայաստանում, այլ նաև սփյուռքում։ Եվ, իհարկե, Ղրիմի հայ համայնքը անտարբեր չէ այս իրադարձություններից», - ասել է հաղորդման հյուրը։
Հայաստանում նման հակաեկեղեցական տրամադրությունները դրսևորվում են հենց հանրապետության ղեկավարության կողմից, նշել է Խանանյանը։ Ղրիմի հայերը միակարծիք են, որ Հայաստանի իշխանությունների կողմից նման վարքագիծը անընդունելի է, քանի որ Հայ Առաքելական Եկեղեցին ոչ միայն ժողովրդի հոգևոր կենտրոնն է, ընդգծել է նա։ «Այն պայմաններում, երբ հայկական պետականությունը դժվարին վիճակում էր, Հայ եկեղեցին իր վրա վերցրեց ինչպես պետական, այնպես էլ ազգային կյանքի կառավարումը։ Եվ այսօր Հայ եկեղեցին միավորում է հայերին ոչ միայն Հայաստանում, այլ նաև ամբողջ աշխարհում», - ասել է քահանան։
Այս առումով, ՀԱԵ-ի դեմ ուղղված ցանկացած հարձակում և անհիմն քննադատություն հարձակում է ոչ միայն եկեղեցու ինստիտուտի, այլ նաև հայ ժողովրդի ինքնության վրա, ասել է քահանան։
«Եվ մենք աղոթում ենք, որ Հայաստանի Հանրապետության ղեկավարությունը, գիտակցելով իր թույլ տված սխալը, ներողություն խնդրի Հայ եկեղեցու հիերարխիայից և գործնականում ապացուցի, որ հասկանում է նրա բացառիկ դերը հայ ժողովրդի կյանքում», - ասել է Խանանյանը։ Խանանյանը կարծում է, որ ստեղծված իրավիճակը կլուծվի եկեղեցու և կառավարության միջև հաշտեցման միջոցով, բայց տեղի ունեցածը անարդյունք չի մնա։ «Եկեղեցին այս պատմությունից դուրս կգա ավելի ուժեղ այնպես, ինչպես միշտ է պատահում հալածանքների գործընթացում։ Եվ եկեղեցու շուրջ միավորվող համայնքները կդառնան ավելի միասնական», - եզրափակել է քահանան։
Նյութը հրապարակման պատրաստեց Կամո Խաչիկյանը
