Կամչատկայում հզոր երկրաշարժից հետո ցունամիի առաջին ալիքները հասել են Կալիֆոռնիայի ափ

ՌԴ Կամչատկայի երկրամասի ափերի մոտ տեղի ունեցած հզոր երկրաշարժից հետո ցունամիի առաջին ալիքները հասել են ԱՄՆ Կալիֆոռնիա նահանգի ափ, հայտնում է CNN-ը:

Կալիֆոռնիայում ջրի մակարդակի բարձրացումը նկատվել է Հյուսիսային Կալիֆոռնիայի Կրեսենտ Սիթիում՝ Օրեգոնի սահմանի մոտ։

Ազգային օվկիանոսային և մթնոլորտային վարչության տվյալների համաձայն՝ դիտվել է 0,3 մետրից ավելի բարձրությամբ ալիք, և շուտով սպասվում են ավելի շատ ալիքներ։

Քաղաքը գտնվում է Հյուսիսային Կալիֆոռնիայի ափամերձհատվածում, որտեղ հայտարարվել է ցունամիի վտանգի ամենաբարձր մակարդակը։ Այս տարածքը գտնվում է ցունամիի բարձրացված ռիսկի ներքո: ԱՄՆ-ի արևմտյան ափի մնացած մասը գտնվում է ցունամիի վտանգի նախազգուշացման տակ։

Հիշեցնենք, որ Կամչատկայի ափերի մոտ տեղի է ունեցել 8,7 մագնիտուդ ուժգնությամբ հզոր երկրաշարժ։ Այն ամենաուժեղն էր 1952 թվականից ի վեր:  Այս մասին փոխանցում է kommersant.ru-ն։

Կուրիլյան բոլոր կղզիների համար հայտարարվել է ցունամիի սպառնալիք։ Երկրաշարժի էպիկենտրոնը գրանցվել է Պետրոպավլովսկ-Կամչատսկից 150 կմ հարավ-արևելք և Հյուսիս-Կուրիլսկից 360,9 կմ հյուսիս-արևելք: Ճեղքվածքը տարածվել է առնվազն 200 կմ հարավ-արևմտյան ուղղությամբ՝ խորջրյա խրամատի առանցքի երկայնքով։

Նշվում է, որ ուժեղ հետցնցումները կշարունակվեն առնվազն մեկ ամիս:  Կամչատկայի առողջապահության նախարարության տվյալներով՝ տուժածներ կան, բայց բոլորը գտնվում են բավարար վիճակում և առանց ծանր վնասվածքների։ Փլուզվել են մի քանի հաստատություններ։ Կամչատկայի երկրամասի կառավարությունը կրճատել է պետական ​​մարմինների աշխատանքային օրը մինչև ժամը 13:00։

Ցունամիի վտանգ է հայտարարվել նաև Ճապոնիայում։ Երկրի կառավարությունը կոչ է արել որոշ շրջանների բնակիչներին տարհանվել։