Կրեմլը մեկնաբանել է Պուտինի և Թրամփի վերջին զրույցը. գործնական խոսակցություն

Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի միջև հուլիսի 3-ին կայացած հեռախոսազրույցը գործնական էր, առաջնորդների զրույցը այն մարդկանց խոսակցություն էր, որոնք ամուր կանգնած են իրենց դիրքորոշումներում, բայց պատրաստ են լսել միմյանց, հայտարարել է ՌԴ նախագահի մամուլի քարտուղար Դմիտրի Պեսկովը, հաղորդում է РИА Новости-ն։

«Դա գործնական, պրագմատիկ զրույց էր այն մարդկանց, որոնք ամուր կանգնած են իրենց դիրքորոշումներում, բայց պատրաստ են լսել միմյանց», - ասել է Պեսկովը «Россия 1»-ի լրագրող Պավել Զարուբինին՝ մեկնաբանելով հուլիսին կայացած Պուտինի և Թրամփի հեռախոսազրույցի տոնայնությունը։

Ըստ Պեսկովի, չնայած իր հռետորաբանությանը, ԱՄՆ նախագահ Դոնալդ Թրամփը հաստատում է իր մտադրությունը՝ շարունակելու անել ամեն ինչ՝ ուկրաինական հակամարտության խաղաղ կարգավորմանը նպաստելու համար։

«Թրամփը աշխարհի խոշորագույն երկրի, աշխարհի խոշորագույն տնտեսության նախագահն է։ Եվ բացի այդ, արդեն բոլորը, այսպես ասած, սովորել են նրա բավականին կոշտ և ուղղագիծ հռետորաբանությանը։ Դրա հետ մեկտեղ նա հաստատում է իր մտադրությունը՝ շարունակելու անել հնարավոր ամեն ինչ՝ խաղաղ կարգավորմանը նպաստելու համար», - նշել է Կրեմլի ներկայացուցիչը։