Տավուշի մարզի դատավորն ու ընտանիքի անդամները հրավիրվել են գույքի բռնագանձման գործերով վարչություն

Տավուշի մարզի առաջին ատյանի ընդհանուր իրավասության դատարանի դատավոր Սամվել Մարդանյանը, կինն ու որդին այսօր՝ 2025թ. մայիսի 29-ին, հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն: Նրանց պատկանող գույքի առնչությամբ իրականացվել է ուսումնասիրություն: Այս մասին հայտնում է Հետք-ը:

1996թ.-ից դատավորի պաշտոն զբաղեցնող Սամվել Մարդանյանը, կինը՝ Շուշանիկ Բադալյանը և որդին՝ Արմեն Մարդանյանը, ներկայանալով ապօրինի ծագում ունեցող գույքի բռնագանձման գործերով վարչություն, կարող են ծանոթանալ գործի նյութերին, ներկայացնել դիրքորոշումներ, ապացույցներ:

Նշենք, որ Դատախազությունն այս փուլում չի հանրայնացնում, թե ինչ գույք է ցանկանում բռնագանձել կամ ինչ դրամային պահանջ ունի դատավորի ընտանիքից։ Պատճառաբանում են, թե շահագրգիռ անձինք կարող են պարզաբանումներ, ապացույցներ ներկայացնել, ինչը կարող է հանգեցնել բռնագանձման ենթակա գույքի ցանկի կամ չափերի փոփոխության։ Հետևաբար, ձեռնպահ են մնում ցանկը նախապես հրապարակելուց։